फ्रेन्डस् सिनेमाले आफ्नो तेस्रो शाखा विस्तार गरेको छ। धरान र बुटवलपछि अब फ्रेन्डस् सिनेमाले इलाममा पनि आफ्नो शाखा विस्तार गरेको हो।
इलाम नगरपालिका–७ मा रहेको चलचित्र घर आउँदो शुक्रबारदेखि आउनेछ।
हलमा एउटा स्क्रिन र १९० सिट क्षमता छ। चलचित्र विकास बोर्डले शुक्रबारबाट सञ्चालनको अनुमति पनि प्रदान गरिसकेको छ।
ग्रामीण क्षेत्रसम्म पहुँच विस्तार गर्ने उद्देश्यसहित इलाममा हल संचालनमा ल्याइएको फ्रेन्डस् सिनेमाले जनाएको छ।
फ्रेन्डस् सिनेमाका निर्देशक आशिस एच तामाङका अनुसार साढे तीन करोड लगानीमा चलचित्र घर तयार भएको हो।
उनले भने, ‘ठूला सहरमा मात्रै चलचित्र घर रहेको अवस्थामा हामीले गाउँगाउँमा पनि फिल्म देखाउने र हेर्ने वातावरण बनाउँदै लैजानुपर्छ भनेर पहाडी जिल्ला इलाममा हल खोलेका हौं। हामी सिनेमाको बजार विस्तार गर्नुपर्छ भन्छौं। तर चलचित्र घर भने काठमाडौं र ठूलो सहरमा मात्रै केन्द्रित गर्छौं।'
बजार विस्तार गर्ने हो भने हरेक जिल्लामा सुविधासम्पन्न हल सञ्चालनमा आउनुपर्ने उनले बताए।
उनले सम्भव भएसम्म अन्य जिल्लामा पनि हल विस्तार गर्ने योजना रहेको बताए। नेपाली फिल्मको बजार विस्तार गर्ने हो भने पहिला घरेलु बजार नै बढाउँदै लैजानुपर्ने उनको धारणा छ।
अहिले पनि ठूला सहरमा बस्नेबाहेकका दर्शकलाई हलमा फिल्म हेर्न वातावरण नरहेको भन्दै तामाङले जिल्ला-जिल्लामा सानासाना सिनेमा घर खोल्ने हो भने अहिलेकै अवस्थामा पनि घरेलु बजार दोब्बरभन्दा माथि बढ्न सक्ने बताए।
-1746009348.jpg)
