प्रियना आचार्य (मुन्नी) फिल्म 'कार्की साइँला' मा अनुबन्धित भएकी छन्। 'झरीपछिको इन्द्रेणी' रिलिजको केही समयमै उनले नयाँ फिल्म साइन गरेकी हुन्।
राजेन्द्र बस्नेतको निर्देशनमा बन्ने 'कार्की साइँला' मा प्रियना अनुबन्ध भएसँगै छायांकनको तयारी थालिएको छ।
फिल्ममा प्रियना अभिनेता जितु नेपालको जोडीको रूपमा देखिनेछिन्। निर्देशक राजेन्द्र बस्नेतले कथाले मागे अनुसार प्रियनालाई अनुबन्ध गरेको बताए। निर्माण पक्षका अनुसार धनकुटामा फिल्मको छायांकन हुनेछ।
निर्देशक बस्नेतले भने, 'हाम्रो कथा अनुसार हामीले धनकुटाका विभिन्न स्थानमा छायांकन गर्नेछौं।'
फिल्ममा जितु र प्रियनाका साथमा सुशील पोखरेल, विरेन्द्र सिंह कुशहुवा, मान्शी शर्मा, मनिल तामाङ, रेणुका आचार्य, दिप्सन लिम्बु, रोदा राई, कमल देवकोटालगायत कलाकारहरूको अभिनय रहने छ।
कर्णबहादुर फिल्मस् प्रालिको व्यानरमा निर्माण हुने फिल्मका निर्माता बालकुमार राई हुन्। कृष्ण भगत चाम्लिङको प्रस्तुति रहेको फिल्ममा मुख्य सहायक निर्देशन रोजल थापाले गर्दैछन्।
डम्बर राईको छायांकन रहने फिल्ममा द्वन्द्ध निर्देशन किरण दाहालको र संगीत दिप्सन लिम्बुको रहनेछ।
-1746009348.jpg)
