इन्स्टाग्रामले चर्चित नेपाली 'मोटोभ्लगर' सुरक्षा केसीको रिल्स भिडिओ आफ्नो अफिसियल अकाउन्टमार्फत पोस्ट गरेको छ।
विश्वप्रसिद्ध सामाजिक सञ्जाल इन्स्टाग्रामले बिहीबार बिहान सुरक्षाको रिल्स आफ्नो अकाउन्टमा प्रस्तुत गरेको हो। रिल्स सेयरसँगै इन्स्टाग्रामले सुरक्षालाई फलो समेत गरेको देखिएको छ।
अन्तर्राष्ट्रिय स्तरको प्लेटफर्मले नेपाली कन्टेन्ट क्रिएटरको सामग्री सेयर गरेको सम्भवतः पहिलोपटक हो।
सुरक्षाका अनुसार इन्स्टाग्रामले केही महिनाअघि उनलाई सन्देश पठाएको थियो। त्यसपछि इमेलमार्फत कुरा भएको र आफ्नो एउटा पहिल्यै पोस्ट भएको रिल्स मन परेको बताएको सुरक्षाले बताइन्।
'उक्त रिल्स सेयर गर्न अनुमति मागेपछि मैले दिएँ', उनले भनिन्। उक्त रिल्स इन्स्टाग्रामले 'इन द मोमेन्ट' क्याप्सन लेख्दै अफिसियल अकाउन्टमा पोस्ट गरेको छ।
उनले भनिन्, 'इन्स्टाग्रामजस्तो विश्वव्यापी प्लेटफर्मले मेरो काम मन पराएर आफैं सम्पर्क गर्नु र अनुमति लिएर रिल्स सेयर गर्नु मेरो लागि अत्यन्त खुसीको कुरा हो।' यसले नेपाली कन्टेन्ट पनि अन्तर्राष्ट्रिय स्तरमा पुग्न सक्छ भन्ने आत्मविश्वास दिएको उनको भनाइ छ।
इन्स्टाग्रामले रिल्स सेयर गरेसँगै सुरक्षाको सामाग्रीमा अन्तर्राष्ट्रिय दर्शकको समेत चासो बढेको छ।
पोखरा घर भएकी सुरक्षा चर्चित मोटोभ्लगर हुन्। नेपालका विभिन्न स्थानमा मोटरसाइकल यात्रा गर्दै उनले आफ्ना अनुभव र साहसिक क्षणहरू भिडिओमार्फत सार्वजनिक गर्दै आएकी छन्।
यो पनिः नेपालको चर्चित मोटो–भ्लगर जोडीको प्रेम र करिअरको कथा
उनलाई इन्स्ट्राग्राममा पछ्याउनेको संख्या ६ लाख ३ हजार छ। त्यस्तै, टिकटकमा ४ लाख ५४ हजार फ्लोअर्स कमाएकी छिन् भने युट्युबमा ९ लाख ४२ हजार सब्सक्राइबर्स छन्।
-1746009348.jpg)
