नयाँ वर्ष नेपाली फिल्मका लागि सधैं महत्वपूर्ण प्रदर्शन समय मानिन्छ। यस अवसरलाई लक्षित गर्दै हरेक वर्ष फिल्म प्रदर्शनमा आउने गरेका छन्।
यसपालि पनि नयाँ वर्षको अवसरलाई लक्षित गर्दै चैत अन्तिम साता र बैशाख १ गतेका लागि केही नेपाली फिल्महरूले प्रदर्शन मिति तय गरेका छन्। तर, प्रदर्शन तालिकामा फेरबदल हुँदा सीमित फिल्म मात्रै रिलिज हुने भएका छन्।
चैत २७ गतेका लागि सुरूमा तीन फिल्मबीच प्रतिस्पर्धा हुने तय थियो। विराज भट्ट अभिनीत फिल्म 'राम नाम सत्य', रेखा थापा, निरूता सिंह र पूजा शर्माको अभिनय रहेको '३६ को आँकडा' तथा सागर लम्साल 'बले' अभिनीत 'डल्लेले इन्ट्री मार्यो' सोही मितिमा आउने तयारीमा थिए। तर अहिले परिस्थिति फेरिएको छ।
सबिर श्रेष्ठ निर्देशित '३६ को आँकडा' र राजु गिरी निर्देशित 'डल्लेले इन्ट्री मार्यो' पोस्टेपोन्ट भएसँगै चैत २७ मा एउटा मात्रै फिल्म रिलिज हुने भएको हो।
निर्देशक सबिरले '३६ को आँकडा' को प्राविधिक काम नसकिएको र प्रचारका लागि समय अपुग हुने भन्दै चैत २७ मा रिलिज नहुने भएको सेतोपाटीसँग बताए।
'पूर्वनिर्धारित मितिमा नआउने भयो। अब टिमसँग सल्लाह गरेर केही दिनमा फिल्मको नयाँ प्रदर्शन मिति घोषणा गर्छौ,' सबिरले भने।
त्यस्तै, फिल्म 'डल्लेले इन्ट्री मार्यो' पनि निर्धारित मितिबाट पछि सरेको हो। निर्देशक राजु गिरीले पनि फिल्मको केही प्राविधिक काम बाँकी रहेको र प्रचार प्रसारका लासगि पर्याप्त समय नभएको कारण देखाउँदै रिलिज पोस्टपोन्ट गरेका हुन्। उनले पनि नयाँ मिति तय नभइसकेको बताए।
यी दुई फिल्म पछि सरेसँगै अब चैत २७ मा ‘राम नाम सत्य’ मात्र प्रदर्शनमा आउने भएको छ। त्यस्तै, बैशाख १ गतेका लागि तुलसी घिमिरे निर्देशित फिल्म 'पहाड' को प्रदर्शन तय छ। विपिन कार्की, मदनकृष्ण श्रेष्ठलगायत कलाकारहरूको अभिनय रहेको यस फिल्मले पनि नयाँ वर्षको दर्शक तान्ने लक्ष्य राखेको छ।
यसरी, नयाँ वर्षमा ठूलो भिडन्तको अपेक्षा गरिए पनि अन्ततः सीमित फिल्मबीच प्रतिस्पर्धा हुने देखिएको छ।
अब प्रचारको प्रभाव, दर्शकको प्रतिक्रिया र रिलिज व्यवस्थापनले नै बक्स अफिसको परिणाम निर्धारण गर्नेछ।
त्यसबेला केही विदेशी फिल्म पनि प्रदर्शनमा आउने तयारीमा छन्।
यस्तो छ 'राम नाम सत्य' को टिजर
यस्तो छ 'पहाड' को टिजर
