'नेपाल ग्रामीण चलचित्र महोत्सव' को पाँचौं संस्करण आउँदो बैशाखमा हुने भएको छ। बैशाख १५ देखि १७ गतेसम्म सर्लाहीमा यो महोत्सव हुने भएको हो।
नेपाली मौलिक ग्रामीण कथावस्तुमा आधारित फिल्मलाई प्रोत्साहन गर्ने उद्देश्यले सञ्चालन हुँदै आएको यो महोत्सव यसपटक मधेश प्रदेशको सर्लाही जिल्ला, चन्द्रनगर गाउँपालिकामा आयोजना गरिने भएको आयोजक संस्था सेलिब्रेटी नेपाल प्रतिष्ठानका अध्यक्ष रघुनाथ सापकोटाले बताए।
उनका अनुसार महोत्सव आयोजनाबारे चन्द्रनगर गाउँपालिकाका अध्यक्ष राजकुमार महतोसँग विस्तृत छलफल भई तयारी कार्य अघि बढिसकेको छ।
'हिमाल, पहाड, तराई कोही छैन पराइ' भन्ने मूल नारालाई आत्मसात गर्दै विगतका संस्करणहरू पहाडी क्षेत्रमा सफलतापूर्वक सम्पन्न गरिएको महोत्सव यसपटक तराईमा विस्तार गर्न लागिएको आयोजकले जनाएको छ।
ग्रामीण कथा, स्थानीय संस्कृति र समुदाय–केन्द्रित सिनेमालाई प्रवद्र्धन गर्ने उद्देश्य बोकेको महोत्सवले अब तराई क्षेत्रका दर्शक, सर्जक र समुदायलाई समेट्दै ‘सबैको सिनेमा, सबैका लागि’ भन्ने अवधारणालाई सशक्त बनाउने लक्ष्य लिएको छ।
'हाम्रो गाउँ, हाम्रो कथा, हाम्रो सिनेमा' भन्ने नारालाई सार्थक बनाउँदै गाउँ–गाउँमा सिनेमा पुर्याउने अभियानस्वरूप महोत्सव सुरू गरिएको हो।
महोत्सवका लागि आह्वान गरिएका नेपाली मौलिक ग्रामीण कथावस्तुमा आधारित फिल्महरूतर्फ फिचर, सर्ट तथा विभिन्न भाषाभाषी फिल्म गरी ५० भन्दा बढी आवेदन प्राप्त भएको आयोजकले जानकारी दिएको छ। तीमध्ये निर्णायक मण्डलबाट छनोट गरिएका फिल्महरू महोत्सवमा प्रदर्शन गरिनेछन् भने उत्कृष्टलाई विभिन्न विधामा अवार्ड प्रदान गरिनेछ।
महोत्सवमा ग्रामीण परिवेश झल्किने छोटा फिल्म, डकुमेन्ट्री, फिचर फिल्म तथा विविध भाषाभाषीका फिल्महरू गाउँकै दर्शकमाझ निशुल्क प्रदर्शन गरिनेछ। अफिसियल सेलेक्सन सूची आगामी हप्ताभित्र सार्वजनिक गरिने आयोजकले जानकारी दिएको छ।
नेपाली मौलिक फिल्मप्रति दर्शकको आकर्षण बढाउनु, नियमित रूपमा चलचित्र हेर्ने संस्कार विकास गर्नु, ग्रामीण कथामा आधारित सिनेमालाई अन्तर्राष्ट्रिय स्तरसम्म पुर्याउनु तथा स्थानीय भाषा, कला, संस्कृति र पर्यटनको प्रवद्र्धन गर्नु महोत्सवको प्रमुख उद्देश्य रहेको अध्यक्ष सापकोटाले बताए। उनले भने, 'ग्रामीण कथावस्तुमा आधारित फिल्मलाई प्राथमिकता दिँदै आएका छौं। यसले फिल्म भवन नभएका गाउँका दर्शकलाई पनि सिनेमा संस्कृतिसँग जोड्ने विश्वास लिएका छौं।'
महोत्सवमा फिल्म प्रदर्शनसँगै अन्तरक्रिया तथा विभिन्न संवाद कार्यक्रमहरू पनि समावेश गरिनेछन्।
यसअघि महोत्सव गोरखाको लाप्राक, काभ्रेपलाञ्चोकको भकुण्डेबेसी, रामेछाप र रसुवामा सफलतापूर्वक सम्पन्न भइसकेको छ। मधेश प्रदेशमा अपेक्षाकृत कम फिल्म गतिविधि हुने भएकाले यसपटकको संस्करण अझ विशेष रहने विश्वास रहेको महोत्सव संयोजक कमल एक्चै मगरले बताए।
महोत्सव चलचित्र विकास बोर्ड र चन्द्रनगर गाउँपालिकाको सहकार्यमा आयोजना हुनेछ।
