यस वर्ष फिल्म प्रदर्शनको तथ्यांक नेपालीभन्दा विदेशी फिल्मको संख्या उल्लेख्य रूपमा बढी देखिएको छ।
२०८२ को बैशाखदेखि चैतसम्ममा ९३ वटा विदेशी फिल्म प्रदर्शनमा आएका छन्। जबकि नेपाली फिल्म ५६ वटा मात्र रिलिज भए। यसअनुसार विदेशी फिल्मको संख्या नेपालीभन्दा करिब ३७ वटा अर्थात् झण्डै ६६ प्रतिशत बढी हो।
तर, फिल्मको संख्या धेरै भए पनि व्यापारिक हिसाबले भने विदेशी फिल्मले नेपाली फिल्मलाई धेरै पछि पार्न सकेका छैनन्।
विदेशी फिल्मले कुल १ अर्ब ११ करोड ५२ लाख रूपैयाँ कमाइ गर्दा नेपाली फिल्मले पनि १ अर्ब ८ करोड ३८ लाख रुपैयाँ बराबरको व्यापार गरेका छन्। दुवैबीचको अन्तर करिब ३ करोड रूपैयाँ मात्रै छ।
यो तथ्यांकले देखाउँछ कि विदेशी फिल्मको रिलिज संख्या बढी भए पनि नेपाली फिल्मले सीमित संख्यामा प्रदर्शन भएर पनि व्यापारमा बलियो उपस्थिति देखाएको छ।
दर्शक संख्यामा नेपाली फिल्म अझै अगाडि देखिएका छन्। नेपाली फिल्म हेर्ने दर्शक संख्या ३७ लाखभन्दा बढी रहँदा विदेशी फिल्मका दर्शक करिब ३३ लाख छन्।
यसले देखाउँछ नेपाली चलचित्र उद्योगले कम फिल्म रिलिज भए पनि दर्शक आकर्षण र व्यापारिक प्रभाव दुवैमा बलियो पकड बनाउँदै गएको छ र घरेलु बजारमा विदेशी फिल्मसँग सशक्त प्रतिस्पर्धा गरिरहेको छ।
२३० फिल्म दर्ता
यसवर्ष रिलिजको तुलनामा दर्ता भएका फिल्मको संख्या निकै धेरै देखिएको छ। यसवर्ष चलचित्र विकास बोर्डमा २३० वटा फिल्म दर्ता भएका छन् भने ९४ वटा फिल्मले सेन्सर सिफारिस प्राप्त गरेका छन्। यसैगरी, यसवर्ष देशभर ८ वटा नयाँ सिनेमा हल दर्ता भएका छन्। त्योसँगै हाल सञ्चालनमा रहेका कुल हल संख्या १७२ पुगेको छ।
वितरण क्षेत्रतर्फ पनि यस वर्ष उल्लेखनीय गतिविधि देखिएको छ। बोर्डको विवरणअनुसार ९ वटा नयाँ वितरक दर्ता भएका छन्। त्योसँगै कुल वितरक संख्या ४४ पुगेको छ।
यो पनि पढनुहोस्
यस वर्ष नेपाली फिल्मको व्यापार १ अर्ब ८ करोड नाघ्यो
'कान्ताराः च्याप्टर १' र 'धुरन्धर २' दुवैले १२ करोडमाथि कमाए, धेरै कमाउनेमा अरू कुन-कुन परे?
