सर्वोच्च अदालतले ‘लालीबजार’ फिल्म रोक्न माग गरिएको रिटमा अन्तरिम आदेश दिन अस्वीकार गरेको छ।
शुक्रबार न्यायाधीशहरू महेश शर्मा पौडेल र सुनिलकुमार पोखरेलको इजलासले फिल्म प्रदर्शनीमा समेत आइसकेको हुँदा निवेदन परेमा फिल्म हेरेर अन्तरिम आदेश जारी गर्ने वा नगर्नेबारे निर्णय लिन आदेश दिएको हो।
रोसनी नेपालीले उच्च अदालत पाटनमा फिल्म रोक्न माग गर्दै रिट दायर गरेकी थिइन्। तर उक्त रिटमा उच्च अदालतले अन्तरिम आदेश जारी गर्न अस्वीकार गरेको थियो।
त्यतिबेला उक्त फिल्म प्रदर्शनमा आएको थिएन। त्यही उच्च अदालतको निर्णय चित्त नबुझेको भन्दै रोसनीले उक्त आदेशलाई बदर गर्न माग गरी सर्वोच्चमा रिट दिएकी थिइन्।
सर्वोच्चले हाल फिल्म प्रदर्शनमा आइसकेको र सन्दर्भ समेत फरक परेको हुँदा उच्च अदालतमा रिट परेमा फेरि सुनुवाइ गर्न भनेको हो।
‘...आधार र कारणसहित निवेदन दिएमा आवश्यकताअनुसार विवादित चलचित्र अवलोकन गरी अन्य कुनै कुरा बुझ्न आवश्यक भए बुझी सात दिनभित्र अन्तरिम आदेश जारी गर्नुपर्ने वा नपर्ने सम्बन्धमा आदेश गर्नू,’ सर्वोच्चले ध्यानाकर्षण गराएको छ।
उक्त फिल्म वैशाख २५ गतेदेखि प्रदर्शनरत छ।
