चलचित्र 'एलिफेन्ट्स इन द फग' लाई प्रतिष्ठित कान्स फिल्म फेस्टिभलमा प्रिमियर भएकोमा नेपाल सरकारले बधाईं दिएको छ।
अविनाश बिक्रम शाह निर्देशित चलचित्र 'एलिफेन्ट्स इन द फग' विश्व प्रतिष्ठित कान्सको मुख्य प्रतिस्पर्धा मानिने अन सर्टेन रिगार्ड विधामा छनोट भई बुधबार प्रिमियर भएको थियो।
सूचना तथा सञ्चारमन्त्री डा. विक्रम तिमिल्सिनाद्धारा जारी सन्देशमा उक्त उपलब्धिले नेपाली चलचित्र क्षेत्रको क्षमता, सिर्जनशीलता तथा अन्तर्राष्ट्रिय प्रतिस्पर्धात्मकतामा भएको उल्लेखनीय प्रगतिलाई उजागर गरेको उल्लेख गरिएको छ। साथै, नेपाली कथा, संस्कृति र सामाजिक यथार्थलाई विश्वकै प्रतिष्ठित चलचित्र मञ्चमा प्रस्तुत गर्नु राष्ट्रकै गौरवको विषय भएको जनाइएको छ।
सन्देशमा निर्देशक तथा लेखक अविनाश विक्रम शाह, निर्माता अनुप पौडेल, कलाकार पुष्पा थिङ लामालगायत सम्पूर्ण निर्माण टोलीलाई बधाई दिँदै नेपाली चलचित्र उद्योगलाई अन्तर्राष्ट्रिय स्तरमा स्थापित गर्न चलचित्रले योगदान पुर्याएको उल्लेख गरिएको छ।
'आगामी दिनहरूमा यस्ता गुणस्तरीय, सिर्जनात्मक र अन्तर्राष्ट्रिय मञ्चमा प्रतिस्पर्धा गर्न सक्षम चलचित्रहरूको प्रवद्र्धन र विकासका लागि नेपाल सरकार पूर्ण रूपमा प्रतिबद्ध रहेको स्पष्ट गर्न चाहन्छु,' सन्देशमा भनिएको छ।
