चन्द्र पन्तको निर्देशनमा निर्माण हुन लागेको फिल्म 'आ बाट आमा २'मा 'मेरो डान्स युनिभर्स २'की विजेता रिस्ता गुरूङ अनुबन्धित भएकी छन्।
निर्माण टिमले पत्रकार सम्मेलनमार्फत उनलाई फिल्मकी अभिनेत्रीका रूपमा सार्वजनिक गरेको हो।
अनुबन्धपछि अभिनेत्री गुरूङले राम्रो टिमसँग काम गर्ने अवसर पाउँदा खुसी लागेको बताइन्। उनले कलाकारको जोडीभन्दा पनि टिमसँग काम गर्न पाउनु आफ्नो लागि महत्वपूर्ण रहेको उल्लेख गरिन्।
'यस्तो राम्रो टिमसँग काम गर्न पाउँदा खुसी लागेको छ,' उनले भनिन्, 'पल शाह वा आकाश श्रेष्ठको जोडीमा भन्दा पनि यो टिमसँग काम गर्न पाउनु नै आफूलाई भाग्यमानी ठानेकी छु। सबैसँग काम गर्न पाउँदा खुसी लाग्छ।'
यता निर्देशक तथा निर्माता चन्द्र पन्तले भने रिस्ता गुरूङको जोडी को हुने भन्ने विषयलाई गोप्य राखेका छन्। उनले उक्त विषयलाई अहिलेका लागि ‘सरप्राइज’ नै रहने बताए।
'उहाँ ‘आ बाट आमा २’की हिरोइन हुनुहुन्छ,’ निर्देशक पन्तले भने, ‘अब उहाँको जोडी को हो भन्ने कुरा अहिले खुलाउन चाहन्नौं।'
रिस्ता रियालिटी शो ‘मेरो डान्स युनिभर्स २’की विजेता हुन्। आगामी असोज ३० गते अर्थात् दसैंको फूलपातीको अवसर पारेर प्रदर्शनमा आउने घोषणा भएको यस फिल्ममा यसअघि नै पल शाह, आकाश श्रेष्ठ, विपना थापा, प्रदीप रावत, साइग्रेस पोखरेल, गजित विष्ट र नरेन खड्का अनुबन्धित भइसकेका छन्।
फिल्मको कथा तथा पटकथा निर्देशक चन्द्र पन्त स्वयंको छ। यो गत वर्ष प्रदर्शनमा आएको सफल फिल्म 'आ बाट आमा'को सिक्वेल हो। अघिल्लो संस्करणले बक्स अफिसमा झन्डै १४ करोड रुपैयाँको व्यापार गरेको थियो। सोही कथालाई निरन्तरता दिँदै निर्माण टिमले सिक्वेल निर्माण गर्न लागेको हो।
केही साताभित्रै फ्लोरमा जाने तयारीमा रहेको फिल्मको अमेरिका र क्यानडाको प्रदर्शन अधिकार भने पहिले नै बिक्री भइसकेको निर्माण पक्षले जनाएको छ। नेपालमा फिल्मको वितरण आरआर फिल्म्सले गर्नेछ भने डिजिटल अधिकार ओएसआर डिजिटलले लिएको छ।
आर्या इन्टरटेनमेन्ट प्रालिको ब्यानरमा निर्माण हुने फिल्मका प्रोडक्सन म्यानेजर करणसिंह रसाइली छन्।
