मेघौली फिल्म्सको ब्यानरमा निर्माण भएको डार्क कमेडी सिनेमा 'जिरो डिग्री'को प्रदर्शन मिति घोषणा गरिएको छ।
निर्माणपक्षले बिहीबार फर्स्टलुक भिडिओ सार्वजनिक गर्दै फिल्म यही वर्षको तिहारमा रिलिज हुने घोषणा गरेको हो।
सार्वजनिक भिडिओमा अभिनेता विजय बराललाई 'पुन्य चौलागाईं' नामक वडा अध्यक्षको फरक र रोचक अवतारमा प्रस्तुत गरिएको छ। भिडिओमा पृष्ठभूमिबाट गुन्जिने 'जहाँ समस्या, त्यहाँ पुण्य चौलागाईं' भन्ने संवाद तथा त्यसपछि आउने 'यो गाउँमा बाहेक अरू को नै छ र मेरो आफ्नो' भन्ने संवादले उनी गाउँका चलाख र चतुर जनप्रतिनिधि भएको संकेत गर्छ।
विजयलाई भिडिओमा बाक्लो जुँगा, चस्मा, ढाका टोपी र सुटमा सजिएको देखिन्छ।
यो फिल्मले नेपाली राजनीतिक यथार्थ र नेताहरूको दोहोरो चरित्रमाथि डार्क कमेडी शैलीमा व्यंग्य गर्ने संकेत टिजरले गरेको छ। फिल्मको कथा सडक सञ्जाल राम्रोसँग नपुगेको एक विकट गाउँमा केन्द्रित छ।
'जिरो डिग्री' मा सजन काफ्ले र आकाश बरालको संयुक्त निर्देशन तथा पटकथा लेखन छ। यी दुईले यसअघि 'बेहुली फ्रम मेघौली' निर्देशन गरेका थिए।
‘जिरो डिग्री’ मा विजय बरालका साथमा प्रकाश घिमिरे, राजन भुसाल, सनिशा भट्टराई, वसुन्धरा भुसाल, रमेश बुढाथोकी, लोकेन्द्र लेखक, सन्जोग रसाइलीलगायत कलाकारहरूको अभिनय छ।
मोती कार्की कार्यकारी निर्माता रहेको फिल्म निशाल पौडेलले खिचेका हुन् भने चानस पुन मगरको सम्पादन छ।
