नेपाली सिनेमा बजारमा 'फ्राइडे रिलिज'को परम्पराअनुसार आजदेखि तीन नयाँ फिल्म प्रदर्शनमा आएका छन्।
फरक-फरक जनरा र विषयवस्तुमा बनेका 'रोल नं १', 'सेप अफ मोमो' र 'कुम्भ'ले सिनेमा हलमा आफ्नो व्यावसायिक यात्रा सुरू गरेका हुन्।
जोन योञ्जन निर्देशित 'रोल नं १' पारिवारिक कथावस्तुमा आधारित फिल्म हो। फिल्मले विद्यार्थी जीवन, शिक्षा प्रणाली र बालबालिकाले सामना गर्ने मनोवैज्ञानिक दबाबको कथा भन्छ।
फिल्ममा मुकुन भुसाल, सुशांक मैनाली, रेणुनाथ योगी, एवन राज उप्रेती, सिर्जना अधिकारी, बाल कलाकारमा निर्भिक रेग्मी, रिन्चेन लामा, संयम कटुवाल, सिजल श्रेष्ठलगायतको अभिनय छ। फिल्मको कथा महेश दवाडीले लेखेका हुन् भने डीओपी शिवराम श्रेष्ठ र सम्पादन मदन घिमिरेको छ। निर्मातामा विनोद पौडेल र जान्वी पौडेल छन्।
सेन्ट्रल फिल्म एक्जामिनेसन कमिटीले यो फिल्मलाई युनिभर्सल सर्टिफिकेट प्रदान गरेको छ। यसको रनटाइम १५२ मिनेट तय छ।
त्यस्तै, सिक्किमकी निर्देशक त्रिवेणी राईको डेब्यु फिचर फिल्म 'सेप अफ मोमो' शुक्रबारदेखि नेपाल र भारतमा एकसाथ प्रदर्शनमा आएको हो।
नेपाली भाषामा बनेको यो फिल्मले सिक्किमको हिमाली गाउँको पृष्ठभूमिमा एउटै परिवारका तीन पुस्ताका महिलाको जीवन, सम्बन्ध, मौनता र भावनात्मक विरासतको कथा प्रस्तुत गर्छ।
११४ मिनेट लामो ड्रामा विधाको यो फिल्ममा आफ्नो जागिर छाडेर गाउँ फर्किएकी एक महिलालाई केन्द्रमा राखेर कथा प्रस्तुत गरिएको छ। फिल्ममा पशुपति राई, गौमाया गुरूङ, श्यामाश्री शेर्पा, भानु माया राई, राहुल मुखिया, जानकी कडायतलगायत कलाकारहरूको अभिनय छ।
फिल्मको वितरकमा भारतीय अभिनेता तथा निर्माता राणा दग्गुबातीको कम्पनी जोडिएको छ। उनको स्पिरिट मिडियाले फिल्मलाई भारतमा वितरण गरेको हो।
त्यस्तै, फिल्ममा बलिउड निर्देशक जोया अख्तर कार्यकारी निर्माताका रूपमा छिन्। फिल्मलाई कार्यकारी निर्माताको रूपमा जोयासहित पायल कपाडिया र रीमा कागतीलगायत फिल्म निर्माताहरूको बलियो समूहले समर्थन गरेको छ। राणा दग्गुबातीको कम्पनीले वितरणको जिम्मा लिएसँगै फिल्ममा जोयासहितको टिम जोडिएको थियो। फिल्मको कथा र अन्तर्राष्ट्रिय सम्भावना देखेर उनीहरूसँग जोडिएको बताइएको छ।
अन्तर्राष्ट्रिय फिल्म महोत्सवहरूमा प्रशंसा पाएको 'सेप अफ मोमो' किम्फ फिल्म फेस्टिभलमा गत बुधबार नेपाल प्रिमियर भएको थियो।
यस्तै, एक्सन फिल्म 'कुम्भ' पनि प्रदर्शनमा आएको छ। रन्धिर श्रेष्ठको लेखन तथा निर्देशन रहेको फिल्ममा अशोक आर्यन, सृष्टि खड्का, सुनिल थापा, रोहित रूम्बा, सुशील पोखरेल, रोबर्ट सिंहलगायत कलाकारहरूको अभिनय छ।
फिल्ममा सम्राट बस्नेत, प्रदीप खड्का (भारत), सञ्जय थापा र कुमार महर्जनको एक्सन निर्देशन छ। यसको निर्माता रन्धीर श्रेष्ठ र राजेश शाह हुन्। यो फिल्मले हलमा शो भने निकै कम पाएको छ।
एकातिर पारिवारिक ड्रामा 'रोल नं १', अर्कोतर्फ अन्तर्राष्ट्रिय स्तरमा चर्चित 'सेप अफ मोमो' र एक्सन ड्रामा 'कुम्भ' प्रदर्शनमा आएसँगै दर्शकले आफ्नै रूचिअनुसार फिल्म छनोट गर्ने अवसर पाएका छन्। यद्यपि व्यापार भने दर्शकको रोजाइ, फिल्मले पाउने प्रतिक्रियामा भर पर्नेछ।
यसअघि रिलिज फिल्म पनि हलमा प्रदर्शनरत छन्।
