अभिनेत्री काजल कर्णले आफूलाई मधेशी भएकै कारण फिल्म सेटमा विभेदपूर्ण व्यवहार गरिएको र अन्ततः फिल्मबाट हटाइएको आरोप लगाएकी छन्। फिल्म 'चिरञ्जीवी भवः'को छायांकन सेटमा आफ्नो पहिचानमाथि प्रहार गरिएको र मानसिक तनाव दिइएको उनले आरोप लगाएकी हुन्।
काजलले आफूमाथि मेकअपका क्रममा रंगका आधारमा टिप्पणी गरिएको उल्लेख गरेकी छिन्। 'मधेशी' भन्दै उपहास गरिएको, स्क्रिप्टमा नभएका दृश्य जबर्जस्ती गराइएको तथा बाँकी पारिश्रमिक मागेपछि जानकारी नै नदिई आफ्नो ठाउँमा अर्को कलाकारलाई राखिएको काजलले आरोप लगाएकी छन्।
सामाजिक सञ्जालमा लामो स्टाटस लेख्दै उनले श्रमको उचित मूल्य नपाएको पनि दाबी गरेकी छन्।
उनले लेखेकी छन्- 'यो केवल मेरो एउटा भूमिका खोसिएको कथा होइन। यो त नेपाली फिल्म उद्योगभित्र मधेशी कलाकारले भोग्नुपर्ने संकीर्ण सोच र विभेदको नांगो रूप हो। मधेशका छोरीहरूले घरको कुरा र समाजको रुढीवादी सोच जितेर यहाँसम्म आउन कति संघर्ष गर्नुपर्छ, त्यो सेटमा बस्ने ती ‘अहंकारी’हरूले कहिल्यै बुझेनन्। उनीहरूले त केवल मेरो पहिचानमाथि प्रहार गर्न र मलाई मानसिक तनाव दिन मात्र जाने। म यो पत्रमार्फत प्रश्न गर्न चाहन्छु- के मधेशी हुनु नै हाम्रो गल्ती हो?'
काजलको आरोप सार्वजनिक भएपछि फिल्मका निर्देशक दीपक आचार्यले सामाजिक सञ्जालमार्फत ६ बुँदामा त्यसको खण्डन गरेका छन्।
उनले काजलले लगाएको सेटमा तुच्छ व्यवहार भयो भन्ने आरोपमा कुनै सत्यता नरहेको दाबी गरेका छन्। यदि कसैले त्यस्तो व्यवहार गरेको पुष्टि भए तत्काल कारबाही गरिने दीपकले उल्लेख गरेका छन्।
उनले काजल समयमै सेटमा उपस्थित नभएको र अन्तिम समयमा नआउने जानकारी पठाएकाले सुटिङ नरोक्न अर्को कलाकारबाट काम गराइएको बताएका छन्। पारिश्रमिकबारे भने डबिङपछि तेस्रो किस्ता मात्र दिन बाँकी रहेको जानकारी निर्माण टोलीबाट पाएको उनको भनाइ छ।
उनले लेखेका छन्, 'हाम्रो लागि कुनै जातीय वा क्षेत्रीय समुदाय छैन, एउटै समुदाय छ- मानव समुदाय'। हरेक कलाकार हाम्रो लागि समान हुन्।'
यद्यपि निर्देशकको स्पष्टीकरणपछि काजलले फेरि सामाजिक सञ्जालमा पोस्ट लेख्दै आफ्नो आरोप दोहोर्याएकी छन्। उनले निर्देशकले वास्तविकता ढाकछोप गर्न खोजेको आरोप लगाउँदै सेटमा आफूमाथि भएको व्यवहार, पारिश्रमिक विवाद र भूमिकाबाट हटाइएका घटनाबारे आफ्ना भनाइ सत्य रहेको दाबी गरेकी छन्।
काजलले दोस्रो पोस्टमा लेखेकी छन्, 'सत्यलाई फिल्मको क्यानभासमा जति नै रंग्याउन खोजे पनि यसको वास्तविक रङ कहिल्यै खुइलिँदैन।'
उनले ६ बुँदामा जबाफ फर्काएकी छिन्।
