फिल्म 'गौंथली' अमेरिकामा पनि प्रदर्शन हुने भएको छ।
नेपालमा रिलिज भएको एक सातापछि अमेरिकाका विभिन्न सहरमा फिल्म प्रदर्शन हुने भएको हो।
फिल्मको अमेरिकी प्रदर्शन अधिकार (अमेरिका राइट्स) सेभेन सिज इन्टरनेसनल फिल्म्सले खरिद गरेको छ।
'गौंथली'का निर्देशक डा. कपिल रिजाल, कलाकार अरूण क्षेत्री, निर्माता सुमन गिरी तथा सेभेन सिस इन्टरनेसनल फिल्म्सका तर्फबाट रोशन सुवेदीबीच अधिकार खरिद-बिक्रीसम्बन्धी सम्झौतापत्रमा हस्ताक्षर भएको हो।
नेपालमा साउन १ गतेदेखि प्रदर्शनमा आउन लागेको 'गौंथली' साउन ८ गते (जुलाई २४)देखि अमेरिकाका विभिन्न प्रमुख सहरमा एकसाथ प्रदर्शन हुने जनाइएको छ।
प्रदर्शन मिति नजिकिँदै जाँदा फिल्मप्रति दर्शकको उत्साहसँगै अन्तर्राष्ट्रिय बजारबाट पनि माग बढ्न थालेको निर्देशक डा. कपिल रिजालले बताए।
उनका अनुसार ट्रेलर सार्वजनिक भएपछि फिल्मप्रति सकारात्मक प्रतिक्रिया बढेको छ, जसका कारण ओभरसिज बजारबाट प्रदर्शन अधिकारका लागि निरन्तर चासो आउन थालेको हो।
'बिस्तारै हाम्रो सिनेमाको हाइप बढ्दैछ। हाइप बढ्दै जाँदा ओभरसिज मार्केटबाट इन्क्वाइरी पनि बढ्दैछ,' निर्देशक रिजालले भने।
हाल यो फिल्मको ट्रेलर युट्युबको ट्रेन्डिङ नं. १ मा छ। दुई दशकअघि डा. भोला रिजालले निर्माण गरेको 'गौंथली' नेपाली फिल्म इतिहासकै पहिलो गीति (म्युजिकल) फिल्मका रूपमा परिचित छ। उक्त फिल्मले प्रदर्शनको ५१औँ दिनसमेत मनाएको थियो। अहिले सोही नाममा डा. भोला रिजालका छोरा तथा निर्देशक डा. कपिल रिजालले ‘गौंथली’ निर्देशन गरेका हुन्।
भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको फिल्ममा अरूण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सन्जोग रसाइली, सीतादेवी तिमिल्सिना, लक्ष्मीनाथ तिमिल्सिना, राजेन्द्र नेपाली, अंशु ओली, प्रिन्स नेपालीलगायत कलाकारहरूले अभिनय गरेका छन्।
फिल्मको कार्यकारी निर्माता सरला रिजाल छिन्। निर्माताको रूपमा सुमन गिरी र डा. कपिल रिजाल छन्। इन्दु गिरी, मनिष रिजाल, प्रलय रिजाल र जीवन ओली सह-निर्माताको रूपमा रहेका छन्।
डा. भोला रिजालको कथा रहेको फिल्मको पटकथा तथा संवाद लेखनमा निर्देशक डा. कपिलसँगै निश्चल कुँवर, निरज नेपाल र गिरिराज घिमिरेले सहकार्य गरेका छन्। फिल्ममा हरि हुमागाईंको छायांकन, मिलन श्रेष्ठको सम्पादन छ।
