अभिनेत्री तथा निर्देशक दीपाश्री निरौलाको स्वास्थ्य अवस्था स्थिर रहेको अन्नपूर्ण न्यूरो अस्पतालले जनाएको छ।
अस्पतालले सोमबार विज्ञप्ति जारी गर्दै शल्यक्रियापछि दीपाश्रीको स्वास्थ्यमा कुनै नयाँ समस्या नदेखिएको जनाएको हो।
'हाल उहाँको स्वास्थ्य अवस्था स्थिर रहेको छ। उहाँलाई आगामी केही दिन अस्पतालमै राखी विशेषज्ञ चिकित्सकहरूको प्रत्यक्ष निगरानीमा आवश्यक उपचार प्रदान गरिनेछ,' अस्पतालले भनेको छ।
अस्पतालका अनुसार दीपाश्रीको मस्तिष्कमा रहेको ट्युमरको असार २३ गते शल्यक्रिया गरिएको थियो। उनको ट्युमर पूर्ण रूपमा निकालिएको अस्पतालले जनाएको छ। ट्युमरको प्रकृति तथा आवश्यक थप उपचारबारे परीक्षण प्रतिवेदन प्राप्त भएपछि परिवारलाई जानकारी गराइने अस्पतालले उल्लेख गरेको छ।
अस्पतालले स्वदेशमै उपचारप्रति विश्वास व्यक्त गरेकोमा दीपाश्री निरौला र उनको परिवारप्रति आभार प्रकट गरेको छ।
साथै, दीपाश्रीको शीघ्र स्वास्थ्यलाभको कामना गर्दै शुभेच्छुक, सञ्चारमाध्यम तथा आम नागरिकबाट प्राप्त शुभेच्छा र सद्भावप्रति धन्यवाद व्यक्त गरेको छ।
फिल्म ‘छ माया छपक्कै २’ को सुटिङकै बीचमा दीपाश्री बिरामी परेकी थिइन्।
