निर्माता जनक घर्ती मगरले फिल्म 'आकाश वर्षा' निर्माण गर्ने घोषणा गरेका छन्।
बुधबार टाइटल अनाउन्समेन्ट पोस्टर सार्वजनिक गर्दै उनले नयाँ फिल्मको औपचारिक घोषणा गरेका हुन्। उनको अघिल्लो फिल्म 'मितज्यू' प्रदर्शनबाट उत्रिएको छोटो समयमै नयाँ फिल्मको घोषणा गरिएको हो।
जीएम मुभी प्रोडक्सनको प्रस्तुति रहने 'आकाश वर्षा' सुदीप भजुले निर्देशन गर्नेछन्।
सार्वजनिक गरिएको टाइटल पोस्टरमा आकाशबाट हल्का वर्षा भइरहेको दृश्य, बादल र पृष्ठभूमिमा पहाड देखाइएको छ। पोस्टरले मान्छेको जीवनका दुःख, सुख र संघर्षलाई प्रतीकात्मक रूपमा प्रस्तुत गरेको छ भने सिमसिम वर्षाले आशा, प्रेम र नयाँ सुरूआतको संकेत गरेको देखिन्छ।
निर्माता जनक घर्तीले भने, 'यो फिल्म विशुद्ध लभस्टोरी जनरामा आधारित हुनेछ।'
यद्यपि, फिल्मका कलाकार तथा अन्य प्राविधिक टोलीबारे भने हालसम्म कुनै जानकारी सार्वजनिक गरिएको छैन।
पछिल्लो समय नेपाली फिल्म उद्योगमा प्रेमकथामा आधारित फिल्म कम निर्माण भइरहेका बेला जनकले यही विधामा 'आकाश वर्षा' निर्माण गर्न लागेका हुन्। यसअघि उनले सामाजिक कथावस्तुमा आधारित 'घरज्वाइँ' र 'मितज्यू' निर्माण गरेका थिए। 'घरज्वाइँ' हिट फिल्म हो भने 'मितज्यू' ले १ करोड ३२ लाख रूपैयाँभन्दा माथिको ग्रस कमाइ गरेको थियो।
'आकाश वर्षा' को परिकल्पना निर्माता जनक घर्ती मगर स्वयंको छ भने कथा तथा पटकथा अमीर मगरले लेखेका छन्।
यसको देशव्यापी वितरणको जिम्मेवारी रोहित कट्टेल र रत्न श्रेष्ठको आरआर फिल्म्सले लिएको निर्माण पक्षले जनाएको छ।
