गायक दुर्गेश थापा र अभिनेत्री प्रियंका कार्कीको सहकार्य रहेको विवादित गीत 'मास्टर्नी' युट्युबबाट हटाइएको छ।
गायक दुर्गेश थापा र फिल्म निर्माण कम्पनी आयंका फिल्मस् प्रालिले शुक्रबार बेलुका छुट्टाछुट्टै विज्ञप्ति जारी गर्दै उक्त गीत युट्युब तथा सामाजिक सञ्जालबाट हटाइएको जानकारी दिएका हुन्।
साथै, शिक्षकहरू र दर्शकहरूको भावनामा चोट पुगेको भन्दै दुवैले सार्वजनिक रूपमा क्षमायाचना गरेका छन्।
यो गीतका शब्द र प्रस्तुतीकरणलाई लिएर व्यापक आलोचना भएको थियो।
दुर्गेश थापाले जारी गरेको विज्ञप्तिमा भनिएको छ, 'उक्त गीतका केही शब्द तथा प्रस्तुतीकरणका कारण आदरणीय दर्शक, शिक्षक–शिक्षिका तथा गुरुजनहरूको भावनामा ठेस पुगेको महसुस गरेका छौं। त्यसप्रति म तथा सम्पूर्ण टिमका तर्फबाट हृदयदेखि नै क्षमायाचना गर्दछु।'
यस्तै, फिल्मकी निर्माता तथा अभिनेत्री प्रियंका कार्कीले पनि उक्त गीत फिल्मभित्र समावेश गरिएको आधिकारिक गीत नभई प्रचार–प्रसारका लागि मात्र तयार गरिएको बताएकी छन्।
कला र मनोरञ्जन प्रस्तुत गर्ने क्रममा सम्मानित शिक्षक-शिक्षिका पेसाको गरिमामा आँच पुर्याउने कुनै मनसाय नरहेको बताउँदै उनले गल्ती महसुस गरेको उल्लेख गरेकी छन्।
प्रियंकाले लेखेकी छन्, 'हाम्रो प्रस्तुतिले अन्जानमै तपाईंहरूको भावनामा पर्न गएको चोटप्रति म व्यक्तिगत रूपमा र मेरो सम्पूर्ण टिमका तर्फबाट गल्ती महसुस गर्दै हृदयदेखि नै क्षमायाचना गर्दछु।'
प्रियंकाको होम प्रोडक्सनमा बनेको 'मास्टर्नी' भदौ ५ गतेदेखि प्रदर्शन तयारीमा छ।
'मास्टर्नी' गीत गत मंगलबार सार्वजनिक भएको थियो। सार्वजनिक भएसँगै गीतको शब्द र भिडिओको प्रस्तुतिलाई लिएर निकै आलोचना भएको थियो। युट्युबमा आएका हजारौं टिप्पणीमा शिक्षकजस्तो सम्मानित पेशालाई जोडेर यस्तो गीत बनाइनु अनुचित भएको प्रतिक्रिया आएका थिए।
नेपाल शिक्षक महासंघले शुक्रबार मात्रै गीतप्रति आपत्ति जनाउँदै यसको प्रचारप्रसार तत्काल रोक्न माग गरेको थियो।
