अभिनेत्री निरूता सिंह करिब ८ वर्षपछि फिल्मको पर्दामा फर्किँदैछिन्। उनी अभिनीत फिल्म ‘सारथी’को शुक्रबारमात्रै पोस्टर सार्वजनिकसँगै प्रदर्शन मिति घोषणा गरिएको छ।
फिल्म आगामी मंसिर ११ (नोभेम्बर २७) देखि देशभरका हलमा प्रदर्शनमा आउने भएको हो।
यसैबीच, अभिनेत्री निरूताले 'सारथी' को फर्स्टलुक सार्वजनिक गर्दै पुनरागमनबारे धारणा व्यक्त गरेकी छन्।
सामाजिक सञ्जालमा पोस्ट लेख्दै उनले 'सारथी' आफ्नो लागि फिल्ममा फर्किने अवसर मात्र नभई फरक पात्रमार्फत आफूलाई फेरि चिनाउने नयाँ यात्रा भएको बताएकी छन्। यसअघि निर्वाह गरेका भूमिकाभन्दा बिल्कुलै फरक चरित्र निभाउन पाउँदा आफू आकर्षित भएको उनको भनाइ छ।
उनले लेखेकी छन्, 'यो पात्रलाई अभिनय गर्नु मेरो लागि सहज थिएन, तर यही असहजताभित्र मैले कलाकारका रूपमा आफूलाई फेरि खोज्ने अवसर पाएँ।'
निरूताले ८ वर्ष फिल्मबाट टाढा रहे पनि फिल्म भने आफ्नो मनबाट कहिल्यै टाढा नभएको उल्लेख गरेकी छन्। दर्शकले दिएको माया र सम्झना नै आफूलाई पुनः पर्दामा फर्किने ऊर्जा बनेको उनको भनाइ छ।
'सारथी'को कथा, संवेदना र आफ्नो पात्रले आफूलाई भित्रैदेखि छोएको उनले बताएकी छन्। साथै, आफूलाई पुनः पर्दामा स्वीकार गर्ने दर्शक र फिल्मको सम्पूर्ण टिमप्रति आभार व्यक्त गरेकी छन्।
अगाडि लेखेकी छन्, '८ वर्षपछि म फर्किएकी छु। तर यसपटक केवल निरूता सिंह भएर होइन। एउटा नयाँ पात्रको कथा बोकेर। 'सारथी' मेरो लागि पुनरागमनभन्दा धेरै, एउटा नयाँ यात्रा हो।'
पोस्टरमा निरूता काखमा दुधे बालक लिएर गम्भिर मुद्रामा खुट्टाको पैतलाबाट रगत चुहिँदै गरेको अवस्थामा देखिएकी छन्।
निरुताको पछिल्लो रिलिज फिल्म 'दाल भात तरकारी' हो। यो २०७६ सालको बैशाखमा रिलिज भएको थियो।
कुमार गजुरेलको निर्देशनमा बनेको 'सारथी' मा निरूतासँगै उत्तम प्रधान, मुकुन्द श्रेष्ठ, राजेन्द्र केसी, सम्रान्त थापा, गिरी विश्वकर्मा, गायत्री जोशी, कल्पना थापा, मदन थापा, मिलन खड्का, रश्मी गुरुङ, तुलसी राई, आशा विश्वकर्मा, सन्तोष ढकाल, विप्लव खड्का, सागर कँडेल, सुदीप नेपाल, धिरेन कार्कीलगायत कलाकारहरूको अभिनय छ।
म्याग्दीको गुर्जा क्षेत्रमा छायांकन गरिएको फिल्म किम्भे प्रोडक्सन र धिरज फिल्म इन्फिनिटीको ब्यानरमा निर्माण भएको हो। रदिप श्रेष्ठ र प्रदीप रायमाझी निर्माता रहेको फिल्ममा बेक बहादुर विश्वकर्मा र नवीन श्रेष्ठ कार्यकारी निर्माता तथा अमीर केसी लाइन प्रोड्युसर हुन्।
छायांकन संकल्प भुजेलले गरेका हुन्।
फिल्मको वितरणको जिम्मेवारी आरआर फिल्म्सले लिएको छ।
