अभिनेत्री सुहाना थापाले फिल्म 'बाः एक योद्धा' केही फरक र इन्ट्रेस्टिङ रहेको बताएकी छन्।
भदौ १९ गतेदेखि प्रदर्शनमा आउने फिल्म हेर्न आग्रह गर्दै उनले यसमा दर्शकलाई आफ्नै कथासँग जोड्ने विषय रहेको बताइन्। सुहानाका अनुसार फिल्ममा सन्तानका लागि बाबुआमाले गर्ने त्याग र संघर्षलाई प्रस्तुत गरिएको छ। फिल्ममा आफ्नो पात्रमार्फत बाबाले सन्तानका लागि गर्ने त्यागलाई बुझ्ने अवसर पाएको उनको भनाइ छ।
सुहानाले भनिन्, 'हामी सबैलाई हाम्रा बाबा-आमाले हाम्रा लागि गरेको त्याग याद हुन्छ। तर, हामी त्यसलाई उहाँहरूका अगाडि खुलेर भन्न सक्दैनौं। मेरो पात्रले मेरो लागि मेरो बुबाले कसरी त्याग गर्नुभएको छ भन्ने कुरा परिभाषित गरिदिएको छ।'
फिल्ममा रमाइलो पक्षसँगै दर्शकलाई भावनात्मक रूपमा जोड्ने विषय पनि रहेको भन्दै उनले ‘बाः एक योद्धा’ले दर्शकलाई बाँधेर राख्ने विश्वास व्यक्त गरिन्।
सुहाना यसअघि फिल्म ‘परालको आगो’मा देखिएकी थिइन्। अब उनी 'ए मेरो हजुर ५'मा पनि काम गर्दैछिन्।
'बाः एक योद्धा'मा सुहानासँगै दिव्यदेव पन्त, झरना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापा मुख्य भूमिकामा छन्।
हरि लम्सालको लेखन तथा निर्देशन रहेको फिल्ममा नेपाली समाजमा सन्तानको भविष्यका लागि बाबाले गर्ने त्याग, संघर्ष र जीवनभर झेल्ने चुनौतीलाई मुख्य कथाका रूपमा प्रस्तुत गरिएको बताइएको छ।
आर्टिस्टिक इन्टरटेनमेन्टको ब्यानरमा निर्माण भएको फिल्मका निर्माता वसन्त लम्साल हुन् भने अनिल बुढाथोकी कार्यकारी निर्माता छन्। कृष्ण काफ्ले सह-निर्माता र अर्जुन पौडेल लाइन प्रोड्युसर हुन्। शिवराम श्रेष्ठको छायांकन रहेको फिल्मलाई कुवेर सिने डिस्ट्रिब्युसनले वितरण गर्दैछ।
संगीतकार तथा गीतकारका रूपमा परिचित हरि लम्सालको फिचर फिल्म निर्देशनमा यो पहिलो सिनेमा हो।
कुशे औँसी अर्थात् बुबाको मुख हेर्ने दिनको पूर्वसन्ध्यामा प्रदर्शनमा आउन लागेको 'बाः एक योद्धा'लाई पारिवारिक कथामा आधारित फिल्मका रूपमा हेरिएको छ।
