अभिनेता निखिल उप्रेतीको फिल्म 'आचार्य'को टिजर सार्वजनिक भएको छ। मंगलबार ओएसआर डिजिटलको युट्युबमार्फत निखिलको निर्देशन तथा शीर्ष अभिनय रहेको फिल्मको टिजर सार्वजनिक भएको हो।
उनी करिब ११ वर्षपछि निर्देशनमा र ७ वर्षपछि अभिनयमा फर्किएका हुन्।
सन् २०१५ मा 'भैरव' निर्देशन गरेपछि निखिलले अर्को फिल्म निर्देशन गरेका थिएनन्। 'आचार्य'बाट उनी दोस्रो पटक निर्देशनको जिम्मेवारीमा फर्किएका हुन्। त्यस्तै, सन् २०१९ मा प्रदर्शनमा आएको 'भिलेन'पछि ठूलो पर्दाको अभिनयबाट टाढा रहेका निखिल यस फिल्ममार्फत पुनः मुख्य भूमिकामा देखिन लागेका हुन्।
सार्वजनिक १ मिनेट ५६ सेकेन्डको टिजरले 'आचार्य' बदलाको कथामा आधारित रहेको संकेत गर्छ। टिजरमा निखिललाई आफ्ना दुश्मनविरूद्ध आक्रामक एक्सन अवतारमा प्रस्तुत गरिएको छ। एक्सन, स्टन्ट र भावनात्मक दृश्यलाई समेटिएको टिजरमा उनलाई फरक–फरक अवतारमा देख्न सकिन्छ।
नेपाली फिल्ममा कमै देख्न पाइने केही नयाँ शैलीका एक्सन तथा स्टन्टलाई टिजरमा समावेश गरिएको छ। आकर्षक स्टन्ट र उच्चस्तरका एक्सन दृश्यले फिल्ममा निखिलको प्रस्तुति यसपटक फरक हुने संकेत गर्छ।
फिल्ममा निखिलसँगै प्रमोद अग्रहरी, पूर्णिका सिजापति, दीपराज राणा, रघु बाबु, रघु करूमन्ची, रोहित चौधरी, धु्रव कोइराला, रञ्जित कोइराला, सरिता गवाली, अनुप तुलाधर, सुरेश कोहलीलगायत कलाकारहरूको अभिनय छ। रघु बाबू र रघु करूमन्ची दक्षिण भारतीय कलाकार हुन् भने पूर्णिका सिजापतीले यसै फिल्ममार्फत नव-अभिनेत्रीका रूपमा डेब्यु गरेकी छन्। त्यस्तै, दीपराज राणा र रोहित चौधरी बलिउड कलाकार हुन्।
सौरभ लामा, मन्नु विक र नवराज कृष्ण थापाले छायांकन गरेको फिल्ममा शुक्रराज शाहको एक्सन निर्देशन छ। बन्दे प्रसादले सम्पादन गरेको 'आचार्य'को टिजर तथा ट्रेलर सन्देश शाहले तयार पारेका हुन्। फिल्मको निर्माता कृष्ण भट्टराई हुन्।
निर्माण पक्षका अनुसार फिल्मको आधिकारिक ट्रेलर असोज १ गते सार्वजनिक गरिनेछ।
'आचार्य' असोज ९ गतेदेखि प्रदर्शनमा आउने तयारीमा छ।
