रेखा थापा निर्देशित फिल्म 'माया भनेकै यस्तो होला'को पूर्वनिर्धारित प्रदर्शन स्थगित गरिएको छ।
भोटेकोशी-त्रिशुली बाढीपछिको असहज स्थितिलाई ध्यानमा राख्दै फिल्म पूर्वनिर्धारित मितिमा रिलिज नहुने भएको हो।
दिया एन्ड अमु फिल्मस्को निर्माण रहेको 'माया भनेकै यस्तो होला' यही भदौ २६ गतेदेखि प्रदर्शनमा आउने तय थियो। निर्देशक रेखाले फिल्मको प्रदर्शन स्थगित भएको जानकारी दिइन्।
निर्माता तथा अभिनेता दिल श्रेष्ठले पनि फिल्मको पूर्वनिर्धारित प्रदर्शन मिति स्थगित गरिएको जानकारी दिएका छन्। देश शोकमा रहेका बेला मनोरञ्जनात्मक फिल्म प्रदर्शन गर्नु उचित नदेखिएकाले अहिलेलाई प्रदर्शन स्थगित गरिएको उनले बताएका छन्।
अब 'माया भनेकै यस्तो होला' तिहारको अवसर पारेर कात्तिक २० गतेदेखि सार्वजनिक प्रदर्शनमा आउने भएको छ।
यसअघि यही भदौ १९ गतेदेखि प्रदर्शनमा आउने भनिएको फिल्म 'ककाकिकी'ले पनि आफ्नो पूर्वनिर्धारित प्रदर्शन स्थगित गरिसकेको छ।
बाढीका कारण ठूलो क्षति भएपछि नेपाली कलाकार तथा फिल्मकर्मीहरू पनि स्वतःस्फूर्त रूपमा राहत तथा सहयोगमा जुटिरहेका छन्। कतिपय कलाकारले राहत सामग्री वितरण गरिरहेका छन् भने कतिपयले आर्थिक सहयोग गरेका छन्।
