रसुवास्थित भोटेकोशी नदीमा आएको बाढीबाट प्रभावितको सहयोगमा अभिनेत्री प्रियना आचार्य र रजनी केसी सक्रिय भएका छन्।
अभिनेत्री प्रियना आचार्यले आफ्नै व्यक्तिगत पहलमा पाँच गाडी राहत सामग्री नुवाकोट तथा रसुवाका बाढी प्रभावित क्षेत्रमा पठाएकी छन्। पीडितका लागि आवश्यक खाद्यान्न तथा अन्य सामग्री जुटाएर पठाइएको बताइन्।
'अहिले फिल्मको प्रचारप्रसारभन्दा पनि बाढीका कारण बिचल्लीमा परेका मानिसहरूलाई राहतको खाँचो छ। त्यसैले अहिले म पूर्ण रूपमा यसै अभियानमा सक्रिय भएर लागेकी छु,' उनले भनिन्।
यस्तै, अभिनेत्री रजनी केसीले नुवाकोटको विदुर नगरपालिका टारमा स्वास्थ्य शिविर सञ्चालन गरेकी छन्। चिकित्सकसहितको टोली लिएर जन्मजिल्ला पुगेकी उनले बाढीपीडितको निःशुल्क स्वास्थ्य परीक्षणसँगै आवश्यक औषधि वितरण गरिन्।
शिविरबाट करिब साढे दुई सय बिरामीले सेवा लिएको उनले बताइन्।
रजनीले स्वास्थ्य शिविरसँगै पीडितलाई खाद्यान्न, लत्ताकपडा, सरसफाइका सामग्री तथा बालबालिकालाई शैक्षिक र खेलकुद सामग्रीसमेत वितरण गरेकी छन्। बाढीका कारण आफ्नै थुप्रै आफन्त गुमाएकी रजनी विपत्तिको सुरूदेखि नै उद्धार तथा राहतमा सक्रिय हुँदै आएकी छन्।
'यो कुनै एउटा ठाउँको मात्रै पीडा होइन, सारा नेपाली, सारा विश्व दुःखी छ। त्यसैले सबैले हृदय खोलेर सहयोग गर्नुस्,' उनले अपिल गरेकी छन्।
प्रियना अभिनीत 'कार्की साइँला' असोज २ गतेदेखि प्रदर्शनमा आउँदैछ। त्यस्तै रजनीको नयाँ फिल्म 'छ माया छपक्कै २' दसैंमा प्रदर्शन हुने तय छ।
-1746009348.jpg)
