गायक सुशान्त केसीले भारतको चर्चित संगीत कम्पनी 'टि-सिरिज' सँगको सहकार्यमा नयाँ गीत सार्वजनिक गरेका छन्।
'जादुगरी' शीर्षकको हिन्दी गीतको भिडिओ सोमबार मात्रै टि-सिरिजको अफिसियल युट्युबबाट सार्वजनिक गरिएको हो।
टि-सिरिजको प्रस्तुति रहेको भिडिओमा गायक सुशान्त र अभिनेत्री आना शर्माको अभिनय छ।
यो प्रेम भावनामा आधारित गीत हो। गीतको मुख्य भाव आकर्षण, प्रेममा पर्ने अनुभूति र कसैप्रतिको गहिरो मोह वरिपरि घुम्छ। भिडियोमा पनि यही भावलाई दृश्यात्मक रूपमा प्रस्तुत गरिएको छ। भिडिओका निर्देशक थोमस जीएम हुन्।
सुशान्त केसी र टि-सिरिजबीचको यो पहिलो सहकार्य भने होइन। यसअघि टि सिरिजले सुशान्तसँग 'बार्दली'को हिन्दी संस्करणमा सहकार्य गरेको थियो। 'उफ' शीर्षकको उक्त गीत पनि टि सिरिजकै युट्युबमा उपलब्ध छ।
