हाल अमेरिकाको सांगीतिक यात्रामा रहेको ब्यान्ड कन्दराले आफ्नो आगामी प्रस्तुति श्रद्धाञ्जली तथा स्मृति कार्यक्रममा परिणत गर्ने भएको छ।
यही शुक्रबार अमेरिकाको एटलान्टामा तय भएको कार्यक्रमलाई कन्दराले रसुवालगायत विभिन्न क्षेत्रमा आएको भीषण बाढीमा ज्यान गुमाउनेहरूप्रति समर्पित गर्ने जनाएको हो।
कन्दराले सामाजिक सञ्जालमार्फत महाविपद्मा प्रभावित परिवार तथा समुदायप्रति ऐक्यबद्धता जनाउँदै कार्यक्रमको स्वरूप परिवर्तन गर्ने निर्णय गरेको जनाएको छ। अकल्पनीय विपद्का कारण देश शोकमा रहेका बेला मनोरञ्जनभन्दा मानवीय संवेदना महत्वपूर्ण हुने भन्दै ब्यान्डले यसपटकको प्रस्तुति श्रद्धाञ्जली तथा स्मृतिमा केन्द्रित गर्ने बताएको हो।
'देश दुखिरहेको छ। आउनुहोस्, हामी एकजुट बनौं। शोकलाई शक्तिमा बदलौं। संगीतलाई सेवामा बदलौं,' कन्दराले अपिल गर्दै भनेको छ।
कार्यक्रमबाट प्राप्त हुने सहयोग तथा सम्भव भएसम्म ठूलो रकम आकस्मिक राहत कोषमा जुटाउने र आवश्यकताअनुसार पीडित तथा प्रभावित समुदायसम्म पुर्याउने प्रयास गर्ने ब्यान्डले जनाएको छ।
यसबारे ब्यान्डका संस्थापक गायक विवेक श्रेष्ठले भने, 'हाम्रो आवाज, हाम्रो संगीत र हाम्रो मञ्च नै हाम्रो माध्यम हो। त्यसैले यसपटक संगीतलाई सेवामा समर्पण गरी शोकलाई शक्तिमा बदल्नेछौं।'
कन्दराले विपत्तिमा ज्यान गुमाउनेहरूप्रति श्रद्धाञ्जली, शोकसन्तप्त परिवारप्रति समवेदना तथा घाइते र प्रभावित सबैमा शीघ्र स्वास्थ्यलाभको कामना गरेको छ।
गत ७ अगस्टदेखि आगामी ३० सेप्टेम्बरसम्म दुई महिना लामो अमेरिकाको टुरमा रहेको कन्दराले बोस्टन सहरबाट कन्सर्ट सुरू गरेको थियो। 'रिदम अफ चेन्ज' नाम दिइएको सांगीतिक टुरलाई निरन्तरता दिँदै ब्यान्डले एटलान्टापछिका बाँकी दुई सहर भर्जिनिया र कोलोराडोमा प्रस्तुति दिनेछ।
ब्यान्डका अनुसार यी दुवै प्रस्तुतिमा पनि भोटेकोशी-त्रिशूली क्षेत्रमा आएको विनाशकारी बाढीबाट प्रभावित परिवार तथा समुदायप्रति ऐक्यबद्धता जनाइनेछ।
