चीनले विद्युतीय गाडीमा नदेखिने गरी डोर ह्यान्डल प्रयोगमा प्रतिबन्ध लगाएको छ।
पछिल्लो समय आकर्षक र स्टाइलिस्ट देखाउनका लागि गाडीहरूमा सजिल्यै पहिल्याउन नसकिने डोर ह्यान्डल प्रयोग हुँदै आएको छ।
विशेषगरी इलन मस्कको टेस्लाले प्रयोग गर्न थालेपछि यस्ता डिजाइन लोकप्रिय बन्न थालेको थियो। पछिल्लो समय विद्युतीय गाडीहरूमा यस्ता डिजाइनको प्रयोग व्यापक बनेको थियो
चीनले भने यस्ता डिजाइनमै प्रतिबन्ध लगाउने घोषणा गरेको भनेर अन्तर्राष्ट्रिय समाचार संस्था रोयटर्सले लेखेको छ।
चीनको उद्योग तथा सूचना प्रविधि मन्त्रालयले जारी गरेको नयाँ नियमअनुसार अब चीनमा बिक्री हुने कारमा ढोकाको भित्र र बाहिर दुवैतर्फ अनिवार्य रूपमा 'मेकानिकल रिलिज सिस्टम' हुनुपर्नेछ।
नियमअनुसार बुट (डिक्की) बाहेक हरेक यात्रु ढोकाको बाहिरी भागमा कम्तीमा ६ से.मी. × २ से.मी. × २.५ से.मी. भन्दा कम नहुने गरी धँसिएको स्थान हुनुपर्नेछ, जसले ह्यान्डलसम्म सजिलै पुग्न सहयोग गर्नेछ। साथै, कारको भित्रतर्फ ढोका खोल्ने तरिका स्पष्ट देखिने संकेत पनि अनिवार्य गरिएको छ।
यी नियमहरू सन् २०२७ जनवरी १ बाट लागू हुने भनिएको छ। यो निर्णयसँगै यस्तो डिजाइन हटाउने चीन विश्वकै पहिलो देश बन्नेछ।
त्यसरी लुकाइएको विद्युतीय ह्यान्डललाई वैकल्पिक रूपमा भने प्रयोग गर्न मिल्ने भनिएको छ।
लुकेको डोर ह्यान्डल की–फोब, मोबाइल फोन वा थिचेर काम गर्ने प्रणालीमा आधारित हुन्छ।
तर दुर्घटनाको समयमा यस्ता ह्यान्डलले काम नगर्ने जोखिम हुने भएकाले चीनले यस्तो नियम ल्याउन लागेको हो।
गाडी दुर्घटनाका दुइवटा घटनापछि चीनले यस्तो नीति लिएको पनि बिबिसीले लेखेको छ। ती दुवै दुर्घटनामा स्थानीयले उद्धारको प्रयत्न गरे पनि इलेक्ट्रिक फेलियरका कारण ढोका नखुलेको बताइएको छ।
चीनको सरकारी मिडियाका अनुसार गत वर्ष अक्टोबरमा शाओमी एसयू–७ अल्ट्रा सेडान दुर्घटनामा चालकको ज्यान गएको थियो।
दुर्घटनापछि उद्धारमा जुटेका स्थानीयले कारको ढोका खोल्ने प्रयास गरे पनि ढोका नखुलेको उल्लेख गरिएको छ। शाओमीले उक्त घटनाबारे कुनै प्रतिक्रिया दिएको थिएन र नयाँ नीतिमाथि पनि कम्पनीले अहिलेसम्म टिप्पणी गरेको छैन।
चीनमा मात्रै होइन अमेरिकाले पनि यस्ता डिजाइन प्रयोगबारे छानबिन गरेको छ।
टेस्लाको मोडेल ३ सेडानको आपतकालीन डोर रिलिज प्रणालीबारे अमेरिकाले गत वर्षदेखि नै छानबिन सुरु गरेको थियो। उक्त छानबिनका क्रममा टेस्लाले तत्काल कुनै प्रतिक्रिया दिएको थिएन।
चीनको नयाँ नीतिअनुसार अब कारको बाहिरी भागमा ह्यान्डल स्पष्ट रूपमा देखिने स्थानमा राखिनुपर्नेछ र दुर्घटनाको अवस्थामा सजिलै खोल्न मिल्ने गरी डिजाइन हुनुपर्नेछ। भित्री ह्यान्डल पनि यात्रुहरूले स्पष्ट देख्न सक्ने गरी राख्नुपर्ने व्यवस्था गरिएको छ।
चाइना डेलीका अनुसार चीनका शीर्ष १०० बढी बिक्री हुने एनईभीमध्ये करिब ६० प्रतिशतमा यस्ता हिडन डोर ह्यान्डल प्रयोग गरिएका छन्। एनईभीमा पूर्ण इलेक्ट्रिक, हाइब्रिड तथा इन्धनबाट चल्ने गाडीसमेत पर्छन्।
नयाँ नियम चीनमा मात्र लागू भए पनि विश्वको सबैभन्दा ठूलो कार उत्पादक देश भएकाले यसको प्रभाव विश्वव्यापी हुने अनुमान गरिएको छ।
अमेरिका र युरोपमा पनि यस्ता ह्यान्डलमाथि नियमन गर्ने विषयमा छलफल चलिरहेको छ।
-1746009348.jpg)
