नाडा अटोमोबाइल्स एसोसिएसन अफ नेपाल (नाडा) मा नयाँ नेतृत्वले औपचारिक रूपमा जिम्मेवारी सम्हालेको छ।
नवनिर्वाचित अध्यक्ष सुरेन्द्रकुमार उप्रेतीले पदभार ग्रहण गर्दै पद तथा गोपनीयताको सपथ लिएका हुन्।
फागुन २८ गते सम्पन्न केन्द्रीय कार्यसमितिको पहिलो बैठकमा निवर्तमान अध्यक्ष करण चौधरीले अध्यक्ष उप्रेतीलाई औपचारिक रूपमा पद हस्तान्तरण गरेका थिए।
उक्त अवसरमा चौधरीले नयाँ नेतृत्वलाई सफल कार्यकालको शुभकामना व्यक्त गर्दै नाडाको संस्थागत सुदृढीकरण तथा अटोमोबाइल क्षेत्रको विकासमा उप्रेतीको नेतृत्व प्रभावकारी हुने विश्वास व्यक्त गरे।
पदभार ग्रहणपछि अध्यक्ष उप्रेतीले आफ्नो कार्यकालमा नाडाको उद्देश्य, विधान र संस्थागत मूल्य–मान्यताअनुसार संगठनलाई अझ सक्रिय र प्रभावकारी बनाउने प्रतिबद्धता जनाए।
उनले सदस्य व्यवसायीहरूको हित संरक्षण, अटोमोबाइल उद्योगको विकास र सम्बन्धित सरकारी तथा गैरसरकारी निकायहरूसँग सहकार्यलाई प्राथमिकतामा राखेर अघि बढ्ने बताए।
यसैबीच अध्यक्ष उप्रेतीले नाडा विधान २०७८ को दफा २०.१ (ङ) अनुसार महेश पाल, दीपककुमार अग्रवाल र राजेश गिरीलाई केन्द्रीय कार्यसमिति सदस्यमा मनोनयन गरेका छन्।
मनोनित सदस्यहरूलाई स्वागत गर्दै उनले संस्थाका आगामी गतिविधिमा सक्रिय सहभागिता रहने अपेक्षा व्यक्त गरे।
त्यस्तै, केन्द्रीय कार्यसमितिको बैठकले निकट भविष्यमा पदाधिकारी चयनका लागि निर्वाचन प्रक्रिया अघि बढाउने निर्णय समेत गरेको छ।
नाडाले अटोमोबाइल क्षेत्रको समग्र विकास, व्यवसायीहरूको हकहित संरक्षण तथा नीतिगत सहकार्यलाई अझ मजबुत बनाउँदै अघि बढ्ने जनाएको छ।
-1746009348.jpg)
