काठमाडौं उपत्यकामा सञ्चालन हुँदै आएको साझा यातायातको रात्रिकालीन बस सेवामा सात दिनमा ४ हजार २३ यात्रुले यात्रा गरेका छन्।
साझा यातायातले संकलन गरेको तथ्यांक अनुसार वैशाख १ देखि ७ गतेसम्म ४ हजार २३ जना यात्रुहरूले यात्रा गरेका हुन्।
साझा यातायातको सहकार्यमा काठमाडौं र ललितपुर महानगरपालिकाले बूढानीलकण्ठ–लगनखेल र एयरपोर्ट–थानकोट रूटमा यो सेवा सुरू गरेका हो।
दुवै रूटमा राति ८ बजेदेखि ११ बजेसम्म ७ वटा बस सञ्चालन गरिएको साझा यातायातका सिइओ भूपेन्द्र अर्यालले जानकरी दिए।
'यात्रु कम भए पनि सन्तोषजनक नै देखिन्छ। घाटामै भए पनि हामी सञ्चालन गर्छौं,' उनले भने, 'असारसम्म निरन्तर घाटामै भयो भने पनि ललितपुर र काठमाडौं महानगरपालिकाले बजेट छुट्याउने सहमति भएको छ।'
यद्यपि यात्रुहरूको संख्या बढ्दै गयो भने रूट र बस थप्ने योजना छ। उक्त योजनामा बुढानिलकण्ठ र चन्द्रागिरी नगरपालिका पनि रात्रिकालिन बस सेवा सञ्चालन गर्ने कुरामा उत्साहित छन्।
एक सातामा कुन दिन कति चढे यात्रु?
पहिलो दिन ५०४ यात्रु, दोस्रो दिन ५४० र तेस्रो दिन ५४१ यात्रुले सेवा लिएका छन्। चौथो दिन ५९२ पुग्दा यात्रु चाप बढ्दो क्रममा देखिन्छ।
पाँचौं दिन सबैभन्दा बढी ६८३ यात्रु पुगेका थिए। त्यसपछि भने यात्रु संख्या घट्दो क्रममा देखिन्छ। छैटौँ दिन ६१४ यात्रु र सातौँ दिन ५४९ यात्रुले सेवा लिएका छन्।
रूटअनुसार बुढानीलकण्ठ- लगनखेल र एयरपोर्ट- थानकोट मार्गमा यात्रु चाप तथ्यांकमा देखिन्छ।
