बैंक तथा वित्तीय संस्थाहरूमा रहेको निक्षेप ८० खर्ब रूपैयाँ कटेको छ।
नेपाल राष्ट्र बैंकको पछिल्लो तथ्यांक अनुसार जेठ १४ गते यस्तो निक्षेप ८० खर्ब १४ अर्ब रूपैयाँ छ।
रेमिटेन्समा भइरहेको वृद्धि र अन्य क्षेत्रमा लगानी अवसर कम भएका कारण ब्याजदर न्यून भए पनि बैंकहरूमा निक्षेप बढ्ने क्रम उच्च छ।
अहिले बैंकहरूले निक्षेपमा दिने ब्याजदर औसत ३.४० प्रतिशत छ।
पछिल्लो तथ्यांक अनुसार चालु आर्थिक वर्ष २०८२-८३ को नौ महिना (साउनदेखि चैत)सम्ममा मुलुकमा १६ खर्ब ५९ अर्ब रूपैयाँ भित्रिएको छ।
गत आर्थिक वर्षको यही अवधिको तुलनामा यो ३९ प्रतिशतले धेरै हो।
निक्षेप वृद्धिको तुलनामा कर्जा जान नसकिरहेकोले बैंकहरूसँग अहिले १३ खर्बभन्दा धेरै रकम कर्जा लगानीको लागि उपलब्ध छ।
बैंकहरूले कर्जामा लिने ब्याजदर औसत ६.७७ प्रतिशतको न्युन विन्दुमा भए पनि कर्जा जान सकिरहेको छैन।
बैंकहरूले यो अवधिमा ५८ खर्ब ९८ अर्ब रूपैयाँ कर्जा लगानी गरेका छन्।
बैंकहरूको निक्षेपको तुलनामा ७२.९३ प्रतिशत कर्जा लगानी भएको छ।
कर्जा लगानी नगएपछि बैंकहरूले राष्ट्र बैंकमा राखेको रकम १० खर्ब माथि छ।
बैंकहरूमा कर्जा लगानी गरेर उब्रिएको यस्तो रकम राष्ट्र बैंकले विभिन्न मौद्रिक उपकरणमार्फत तानेको हो।
निक्षेप संकलन र स्थायी निक्षेप सुविधा जस्ता वित्तीय उपकरण मार्फत विभिन्न अवधिको लागि राष्ट्र बैंकले बैंकहरूबाट पैसा तान्ने गर्छ।
राष्ट्र बैंकले बैंकहरूमा अधिक पुँजी हुँदा यसरी तान्ने गर्छ भने पुँजी कम हुँदा बैंकहरूको प्रणालीमा पैसाको प्रवाह बढाउन पनि मौद्रिक उपकरण जारी गर्छ।
बैंकहरूले राष्ट्र बैंकमा राखेको यस्तो पैसामा २.६८ प्रतिशतदेखि तीन प्रतिशत ब्याजदरमा पैसा राखिरहेका छन्।
