नेपाल राष्ट्र बैंकले बैंक तथा वित्तीय संस्थाको पुनर्वर्गीकरणको विषयलाई पुनः अघि सारेको छ।
व्यवसायको आकार, प्रकृति र आवश्यकता अनुसार विशिष्टीकृत सेवा प्रदान गर्ने बैंकिङ प्रणालीतर्फ जाने तयारी राष्ट्र बैंकले गरेको हो।
आगामी आर्थिक वर्ष २०८३/८४ को मौद्रिक नीति सार्वजनिक गर्दै गभर्नर डा. विश्व पौडेलले बैंक तथा वित्तीय संस्थालाई व्यवसायको प्रकृति र आकारअनुसार विशिष्टीकृत सेवा दिने अवधारणामा लैजाने गरी पुनर्वर्गीकरणको अध्ययन तथा आवश्यक तयारी गरिने बताएका हुन्।
उनका अनुसार यस्तो व्यवस्थाले बैंकहरूको पुँजी परिचालन लागत घटाउन सहयोग पुग्नेछ।
पुँजी परिचालनमा हुने खर्च कम हुँदा त्यसबाट हुने बचत ऋणीलाई सस्तो ब्याजदरका रूपमा हस्तान्तरण गर्न सकिने अपेक्षा गरिएको छ।
राष्ट्र बैंकले यस अवधारणामार्फत सबै बैंकले एउटै प्रकारका सेवा दिने विद्यमान मोडलभन्दा फरक, निश्चित क्षेत्र वा ग्राहक समूहमा केन्द्रित बैंकिङ प्रणाली विकास गर्ने लक्ष्य लिएको संकेत गरेको छ।
यसबाट बैंकहरूको कार्यक्षमता बढ्ने, स्रोतको प्रभावकारी परिचालन हुने तथा ऋण प्रवाह अझ प्रतिस्पर्धी र किफायती बन्ने अपेक्षा गरिएको छ।
वर्गीकरण र कार्यदायरा पुनरावलोकन गर्न विस्तृत अध्ययन भइरहेको राष्ट्र बैंकले मंगलबार नै सावजनिक गरेको वार्षिक समीक्षामा उल्लेख गरेको थियो।
