नेपाल धितोपत्र बोर्डले धितोपत्र बजारमा देखिएका समस्या र लगानीकर्ताबाट आएका गुनासोप्रति गम्भीर ध्यानाकर्षण भएको जनाएको छ।
बोर्डले आगामी साताभित्र समयबद्ध कार्ययोजनासहितको पुँजी बजार विकास मार्गचित्र सार्वजनिक गरी तत्काल कार्यान्वयनमा लैजाने घोषणा गरेको छ।
बोर्डले बिहीबार जारी गरेको विज्ञप्तिमा बजार सुधार र लगानीकर्ताको हित संरक्षणलाई प्राथमिकतामा राख्दै आवश्यक गृहकार्य भइरहेको उल्लेख गरेको छ।
विज्ञप्तिअनुसार बजारमा देखिएका समस्या समाधान गर्न तथा नियामकीय व्यवस्था थप प्रभावकारी बनाउन विस्तृत मार्गचित्र ल्याइनेछ।
बोर्डले अनुमति प्राप्त धितोपत्र व्यवसायी तथा सम्बन्धित संस्थालाई यसअघि दिइएका निर्देशनहरू, विशेषगरी मार्जिन कारोबारको प्रभावकारी कार्यान्वयन लगायतका विषय तोकिएको समयमै सम्पन्न गर्न निर्देशन दिएको छ।
यससँगै सार्वजनिक निष्कासन प्रक्रिया, नियमन प्रणाली तथा समग्र पुँजी बजारलाई थप स्वस्थ, सुरक्षित र प्रभावकारी बनाउन विद्यमान कानुनी व्यवस्थाको पुनरावलोकन प्रक्रिया पनि सुरू भएको बोर्डले जनाएको छ।
धितोपत्र सम्बन्धी ऐन, धितोपत्र दर्ता तथा निष्कासन नियमावली, सूचीकृत संगठित संस्थाको संस्थागत सुशासन सम्बन्धी निर्देशिका लगायत अन्य सम्बन्धित कानुनी व्यवस्थालाई समयानुकूल परिमार्जन गर्ने तयारी भइरहेको बोर्डले उल्लेख गरेको छ।
बोर्डले बजार सुधारका लागि कानुनी तथा नीतिगत दुवै पक्षमा काम अघि बढिरहेको बताउँदै लगानीकर्तालाई अफवाह र बहकाउमा नपर्न आग्रह गरेको छ।
लगानीसम्बन्धी निर्णय गर्दा आफ्नै अध्ययन, विश्लेषण र जोखिम वहन क्षमतालाई आधार बनाउन बोर्डले अनुरोध गरेको छ।
