अर्थमन्त्री डा. स्वर्णिम वाग्लेले नेपालमा लगानी गरेका २० ठूला बहुराष्ट्रिय कम्पनीका प्रतिनिधिसँग छलफल गर्दैछन्।
आर्थिक वर्ष २०८३-८४ को बजेट कार्यान्वयनसम्बन्धी छलफल शृंखलाअन्तर्गत अर्थमन्त्री वाग्लेले बहुराष्ट्रिय कम्पनीका उच्चपदस्थ विदेशी तथा स्वदेशी साझेदारसँग छलफल गर्न लागेका हुन्।
अर्थ मन्त्रालयको सुवर्ण हलमा दिउँसो १२ बजेबाट सुरू भएको छलफलमा नेपालमा लगानी गरेका २० ठूला करदाता बहुराष्ट्रिय कम्पनीका प्रतिनिधि सहभागी छन्।
छलफलमा सरकारले बजेटमार्फत बहुराष्ट्रिय कम्पनीलाई दिएका सुविधा, नेपालमा लगानी गर्दा उनीहरूले भोगिरहेका समस्या तथा थप लगानी विस्तारका लागि आवश्यक सहजीकरणबारे छलफल भइरहेको अर्थ मन्त्रालयले जनाएको छ।
अर्थमन्त्री वाग्लेले कम्पनीका प्रतिनिधिलाई नेपालमा लगानी विस्तार, रोजगारी सिर्जना र व्यवसायबाट प्राप्त प्रतिफल फिर्ता लैजाने प्रक्रियामा देखिएका समस्या तथा सरकारबाट अपेक्षित सहजीकरणबारे खुलस्त रूपमा आफ्नो धारणा राख्न आग्रह गर्नेछन्।
कम्पनीहरूले आफ्ना समस्या र सुझाव लिखित रूपमा समेत पेश गर्न सक्नेछन्।
यस्तै, उनले नेपालका 'क' वर्गका वाणिज्य बैंकका प्रमुख कार्यकारी अधिकृत तथा नेपाल राष्ट्र बैंकका कार्यकारी निर्देशकहरूसँग समेत बजेट कार्यान्वयन र अर्थतन्त्रका समसामयिक विषयमा छलफल गरिसकेका छन्।
बहुराष्ट्रिय कम्पनीसँगको छलफललाई पनि बजेट कार्यान्वयनका क्रममा निजी क्षेत्रबाट आएका समस्या र सुझाव प्रत्यक्ष रूपमा बुझ्ने तथा लगानीको वातावरण सुधारका लागि आवश्यक नीतिगत तथा प्रक्रियागत सुधार पहिचान गर्ने प्रयासका रूपमा हेरिएको छ।
-1780054382.jpg)
