स्टक ब्रोकर नम्बर ५० क्रिस्टल कञ्चनजंघा सेक्युरिटिज प्रालिले मार्जिन ट्रेडिङ सुविधा सुरू गरेको छ।
कम्पनीले नेपाल धितोपत्र बोर्ड (सेबोन) को नियामकीय व्यवस्था तथा नेपाल स्टक एक्सचेन्ज (नेप्से) ले तोकेको प्रक्रियाअनुसार आजदेखि मार्जिन ट्रेडिङ सेवा सुरू गरेको जनाएको हो।
कम्पनीका अनुसार मार्जिन ट्रेडिङ सुविधामार्फत योग्य लगानीकर्ताले प्रारम्भिक मार्जिन जम्मा गरी कम्पनीमार्फत योग्य सूचीकृत कम्पनीका सेयर खरिद गर्न सक्नेछन्।
यसका लागि लगानीकर्ताले आवश्यक कागजातसहित कम्पनीको कार्यालयमा उपस्थित भएर आवेदन दिई सम्झौता गर्नुपर्नेछ।
क्रिस्टल कञ्चनजंघाले ३० प्रतिशत प्रारम्भिक मार्जिन र ७० प्रतिशत मार्जिन ऋणमा आधारित सुविधा ल्याएको छ।
अर्थात् लगानीकर्ताले सेयर खरिदका लागि आवश्यक रकमको ३० प्रतिशत आफैंले लगानी गरे पुग्ने र बाँकी ७० प्रतिशतसम्म कम्पनीबाट मार्जिन ऋण लिन सक्ने व्यवस्था गरिएको छ।
कम्पनीले सार्वजनिक गरेको योजनाअनुसार १० लाख रूपैयाँदेखि २ करोड रूपैयाँसम्मको कारोबार सीमाका लागि मार्जिन ऋण उपलब्ध हुनेछ।
कारोबार सीमाअनुसार मार्जिन ऋणको रकम ७ लाख रूपैयाँदेखि १ करोड ४० लाख रूपैयाँसम्म हुनेछ।
कम्पनीले मार्जिन ऋणमा ब्याज तथा प्रशासनिक शुल्क लाग्ने जनाएको छ।
सार्वजनिक गरिएको शुल्क तालिकामा ३०, ६०, ९०, १२०, १५० र १८० दिनसम्मका लागि लाग्ने कुल शुल्कसमेत उल्लेख गरिएको छ।
पहिलो ३० दिनपछि प्रत्येक थप ३० दिनका लागि शुल्कमा एक प्रतिशत छुट दिने व्यवस्था गरिएको कम्पनीले जनाएको छ।
मार्जिन ट्रेडिङ सुविधा लिन चाहने लगानीकर्ताले कम्पनीले तोकेको योग्यता तथा आवश्यक कागजात पूरा गर्नुपर्नेछ।
कम्पनीले यस्तो सेवा प्रचलित कानुन, नियामकीय व्यवस्था तथा आफ्नो आन्तरिक जोखिम व्यवस्थापन नीतिअनुसार सञ्चालन गरिने जनाएको छ।
