नेपाल इन्भेष्टमेण्ट मेगा बैंकका सञ्चालक तथा प्रमुख कार्यकारी अधिकृतविरुद्ध काठमाडौं जिल्ला अदालतमा अभियोगपत्र दायर भएपछि नेपाल राष्ट्र बैंकले विद्यमान कानुनी व्यवस्थाबारे आवश्यक राय लिने भएको छ।
सञ्चालक र प्रमुख कार्यकारी अधिकृतविरुद्ध मुद्दा दायर भएको विषयमा बैंकबाट जानकारी प्राप्त भएको जनाउँदै राष्ट्र बैंकले बैंकको सञ्चालन तथा व्यवस्थापनका सम्बन्धमा नजिकबाट अनुगमन भइरहेको जनाएको छ।
घटनासँग सम्बन्धित विद्यमान कानुनी व्यवस्थाबारे आवश्यक राय तथा सुझाव लिएर थप प्रक्रिया अघि बढाइने राष्ट्र बैंकको भनाइ छ।
राष्ट्र बैंकका अनुसार हाल बैंकको तरलता अवस्था तथा वित्तीय सबलताका परिसूचक तोकिएको मापदण्डअनुसार सन्तोषजनक छन्। बैंकको दैनिक कार्यसञ्चालनमा कुनै किसिमको जटिलता उत्पन्न भएको अवस्था नदेखिएको पनि राष्ट्र बैंकले स्पष्ट पारेको छ।
जिल्ला अदालतमा मुद्दा विचाराधीन रहेकाले मुद्दाको प्रकृति, समयावधि र गम्भीरताका आधारमा थप छलफल तथा कानुनी राय लिइने र त्यसका आधारमा बैंकको सञ्चालक समिति, उच्च व्यवस्थापन तथा बैंक सञ्चालनका सम्बन्धमा आवश्यक कदम चालिने राष्ट्र बैंकले जनाएको छ।
