नेपाल राष्ट्र बैंकका गभर्नर, डेपुटी गभर्नर र सञ्चालकको पदावधि अब तीन वर्षको बनाउन अर्थ समितिले सहमति जनाएको छ।
संघीय संसदअन्तर्गतको अर्थ समितिको आज बसेको बैठकमा नेपाल राष्ट्र बैंक ऐन संशोधन विधेयकमाथि दफावार छलफलका क्रममा अर्थ समितिले सहमति जनाएको छ।
समितिले सरकारले आवश्यक ठानेमा थप दुई वर्षसम्म उनीहरूको पदावधि बढाउन सक्ने व्यवस्था गर्न पनि अर्थसमिति सहमत भएको छ।
हाल गभर्नर, डेपुटी गभर्नर र सञ्चालकको पदावधि पाँच वर्ष रहेको छ।
राष्ट्र बैंक ऐन संशोधनका लागि तयार गरिएको प्रस्तावित मस्यौदामा भने गभर्नर, डेपुटी गभर्नर र सञ्चालकको पदावधि एक पटकको लागि थप गर्न सक्ने प्रस्ताव गरिएको थियो।
अर्थ समितिको दफावार छलफलबाट पारित भएको यो व्यवस्था अनुसार मस्यौदा पुनः संघीय संसदमा पुग्नेछ।
संघीय संसदबाट स्वीकृत भएर राष्ट्रपतिबाट प्रमाणीकरण भएपछि मात्रै यो व्यवस्था ऐनका रूपमा कार्यान्वयनमा आउनेछ।
