सरकारले अर्थ मन्त्रालयअन्तर्गतका दुई प्रमुख राजस्व निकायमा नयाँ नेतृत्व नियुक्त गरेको छ।
हालै प्रधानमन्त्री तथा मन्त्रिपरिषद्को कार्यालयबाट अर्थ मन्त्रालयमा सरूवा भएका दुई सहसचिवलाई भन्सार विभाग र आन्तरिक राजस्व विभागको नेतृत्वको जिम्मेवारी दिइएको हो।
भन्सार विभागको महानिर्देशकमा सहसचिव यमलाल भुसाल नियुक्त भएका छन्। भुसाल यसअघि पनि भन्सार विभागको महानिर्देशक भएका थिए।
विभागका निमित्त महानिर्देशक भरतमणि पाण्डेय भने अर्थ मन्त्रालयबाहिर सरूवा भएका छन्।
त्यस्तै, भन्सार विभागको उपमहानिर्देशकमा प्रेमप्रसाद आचार्य नियुक्त भएका छन्।
यस्तै, आन्तरिक राजस्व विभागको महानिर्देशकमा सहसचिव डा. भीष्मकुमार भुसाल नियुक्त भएका छन्। विभागका हालका महानिर्देशक रमेश अर्याल पनि अर्थ मन्त्रालयबाहिर सरूवा भएका छन्।
नयाँ जिम्मेवारी पाएका यमलाल भुसाल, डा. भीष्मकुमार भुसाल र प्रेमप्रसाद आचार्य तीनै जना सहसचिव हालैको मन्त्रिपरिषद् बैठकको निर्णय अनुसार प्रधानमन्त्री तथा मन्त्रिपरिषद्को कार्यालयबाट अर्थ मन्त्रालयमा सरूवा भएर आएका अधिकारी हुन्।
