संवैधानिक इजलासमा प्रतिनिधि सभा विघटनलगायत मुद्दामा सुनुवाइ भइरहेको छ। आइतबारको इजलासमा मुद्दाबारे भन्दा संवैधानिक इजलासमै सवाल-जवाफ भइरहेको छ।
प्रधानमन्त्री केपी शर्मा ओली पक्षका वकिलहरूले संवैधानिक इजलासमा रहेका न्यायाधीशद्वय दीपककुमार कार्की र आनन्दमोहन भट्टराईमाथि प्रश्न उठाएका छन्।
उनीहरूले यसअघि नै अहिलेका मुद्दामा राय दिइसकेकाले इजलासमा बस्न नमिल्ने तर्क गरेका हुन्।
यसअघि अधिवक्ता परशुराम कोइरालाले संसदीय सुनुवाइबाट आएका ११ न्यायाधीशले मुद्दा हेर्न नमिल्ने बताएका थिए।
जवाफमा प्रधानन्यायाधीश चोलेन्द्रशमशेर राणाले सबै न्यायाधीशले मुद्दा हेर्न मिल्दैन भन्नु कसुरजन्य कुरा भएको बताएका थिए।
खाजापछि पनि सरकारी वकिलले कुरा गर्न उठेपछि न्यायाधीश ईश्वर खतिवडाले रिट निवेदकका वकिलको कुरा सुन्ने भन्दै उनीहरूलाई बस्न भने।
'जे भइरहेको छ, हामीलाई कम्फरटेबल भैरहेको छैन। धेरै आयो के यो कुरा इजलासको कुरामा। यसरी आउन भएन। तपाईंहरूको कुरा भयो अब निवेदक पक्षको कुरा सुनौं,’ खतिवडाले भने।
न्यायाधीश खतिवडाले यस्तो बताएपछि अहिले रिट निवेदकका तर्फबाट वरिष्ठ अधिवक्ता बद्रीबहादुर कार्की बोलिरहेका छन्।
