नेपाली कांग्रेसका सभापति एवं प्रधानमन्त्री शेरबहादुर देउवा र प्रमुख प्रतिपक्षी नेकपा (एमाले) का अध्यक्ष केपी शर्मा ओलीबीचको भेटघाट उनीहरू एक-अर्कासँग नोकझोंक गर्छन्। लामो समयदेखि दुबै जनाले एक-अर्कालाई व्यंग्य गर्ने गरेका छन्।
बुधबार बिहान एमाले अध्यक्ष ओली प्रधानमन्त्री देउवालाई भेट्न उनको सरकारी निवास बालुवाटार पुगेका थिए। उनी झन्डै ६ महिनापछि बालुवाटार पुगेका हुन्।
बालुवाटारमा देउवालाई ओलीले चार कुरा राखेका थिए।
पढ्नुस्: बालुवाटारमा देउवालाई भेटेर ओलीले राखे ४ कुरा
ओलीले यीबाहेक अहिलेको सत्ता गठबन्धनबारे पनि देउवासँग कुरा गरेका थिए। गठबन्धनले निषेधको राजनीति अघि बढाएको उनको भनाइ थियो।
‘लोकतन्त्रमा सत्ता पक्ष र प्रतिपक्ष हुन्छन्। उनीहरूबीच प्रतिस्पर्धा हुन्छ। तर एमालेलाई निषेध गर्नका निम्ति सत्ता गठबन्धन ७ दलीय पुग्यो। अब ८,९, १० कति पुर्याउनुहुन्छ?’ ओलीको भनाइ उद्धृत गर्दै भेटमा सहभागी एमाले उपाध्यक्ष सुवास नेम्वाङले भने।
अध्यक्ष ओलीले नागरिकता विधेयकमा राष्ट्रपति विद्यादेवी भण्डारीले संवैधानिक दायरा अनुसार काम गर्दा सत्ता गठबन्धनले राष्ट्रपतिलाई चुनौती दिएर गैरजिम्मेवार चरित्र देखाएको पनि बताए।
‘राष्ट्रपतिले संवैधानिक दायराभित्रै रहेर नागरिकता विधेयकलाई पुनर्विचार गरिनुपर्छ भन्नुभएको हो। तपाईंहरूले गठबन्धनको बैठक नै राखेर कमा, फुलस्टप पनि परिवर्तन नगर्ने निर्णय गर्नुभयो। यो जिम्मेवारपूर्ण काम भएन,’ ओलीको भनाइ थियो।
एमालेले प्रतिनिधि सभा तथा प्रदेशसभाको निर्वाचन निष्पक्ष रूपमा सम्पन्न गराउन पनि प्रधानमन्त्रीको ध्यानाकर्षण गराएको छ।
एमालेले स्थानीय चुनावमा सत्तापक्षले राज्य संयन्त्र प्रयोग गरेर धाँधली गरेको आरोप लगाउँदै आएको छ।
‘विगतका निर्वाचन निष्पक्ष रूपमा भएन। यस पटकको निर्वाचन निष्पक्ष र धाँधलीरहित हुनुपर्छ र समयमै हुनुपर्छ,’ ओलीले देउवाको ध्यानाकर्षण गराएका थिए।