वीरगन्ज महानगरपालिकाको बजार क्षेत्रमा मंगलबार बिहान ९ बजेसम्म कर्फ्यु लगाइएको छ। सोमबार बेलुकी बसेको जिल्ला सुरक्षा समिति बैठकको निर्णयअनुसार स्थानीय प्रशासनले कर्फ्यु आदेश जारी गरेको हो।
राजधानी काठमाडौं लगायत देशका विभिन्न स्थानमा जेन–जी प्रदर्शनमा सुरक्षाकर्मीले गरेको दमनको विरोधमा वीरगन्जमा सोमबार बेलुका प्रदर्शन भएको थियो। प्रदर्शनकारीले वीरगन्जको घन्टाघर र माइस्थान क्षेत्रमा 'मान्छे मार्न पाइँदैन' भन्दै सरकारको विरोधमा नाराबाजी गर्दै प्रदर्शन गरेका थिए।
माइस्थानमा आगो बालेर प्रदर्शन गरिरहेका उनीहरूले आगो निभाउन आएको महानगरपालिकाको दमकल फिर्ता पठाइदिएका थिए।
उनीहरूले मंगलबार पनि प्रदर्शन गर्न सक्ने सम्भावनालाई ध्यानमा राखेर प्रशासनले कर्फ्यु आदेश जारी गरेको हो।
प्रमुख जिल्ला अधिकारी तोयनारायण सुवेदीले सोमबार राति ९ बजेदेखि मंगलबार बिहान ९ बजेसम्मका लागि कर्फ्यु आदेश जारी गरेका हुन्। स्थानीय प्रशासन ऐन २०२८ को दफा ६ (क) बमोजिम जारी आदेशमा वीरगन्ज महानगरपालिकाका बजार क्षेत्रको पूर्वमा बाइपास रोड, पश्चिममा सिर्सिया पुल, उत्तरमा गण्डक चोक र दक्षिणमा शंकराचार्य गेटसम्म कर्फ्यु लगाइएको जनाइएको छ।
कर्फ्यु लगाइएका स्थानमा आवतजावत गर्न, कुनै पनि प्रकारका भेला जुलुस, प्रदर्शन, सभा, बैठक र घेराउ गर्न नपाउने सूचनामा उल्लेख छ।
-1746009348.jpg)
