नेपालले अमेरिकालाई विशाल लक्ष्य दिएको छ।
आइसिसी विश्वकप क्रिकेट लिग-२ अन्तर्गत त्रिवि मैदानमा जारी त्रिकोणात्मक सिरिजको अन्तिम खेलमा नेपालले अमेरिकालाई ३१७ रनको विशाल लक्ष्य दिएको हो।
टस जितेर अमेरिकाले बलिङ रोजेपछि पहिले ब्याटिङ गरेको नेपालले पूरा ओभर खेलेर ३१७ रन बनाएको हो।
नेपालको यो स्कोर एकदिवसीय अन्तर्राष्ट्रिय (ओडिआई)मा दोस्रो ठूलो स्कोर हो।
२०२५ जुनमा लिग-२ कै खेलमा नेपालले स्कटल्याण्डविरूद्ध ३२३ रन जोडेको थियो। यो स्कोर नेपालले एकदिवसीय अन्तर्राष्ट्रियमा बनाएको सबैभन्दा ठूलो स्कोर हो।
नेपालका लागि इशान पाण्डेले सर्वाधिक ८४ रन बनाए।
उनले ८३ बलमा ८ चौका र एक छक्का प्रहार गरे। जारी सिरिजमा अमेरिका विरूद्धको पहिलो खेलबाट डेब्यू गरेका इशानले दोस्रो अर्धशतक प्रहार गरेका हुन्।
दिपेन्द्र सिंह ऐरी ५९ रन प्रहार गरी नट आउट रहे। उनले ५९ बल खेलेर ४ चौका र ४ छक्का प्रहार गरे।
कप्तान रोहित पौडेलले ५९ बलमा २ चौका र १ छक्का प्रहार गरी ४६ रन जोडे। ओपनर आशिफ शेखले ५७ बलमा ६ चौका प्रहार गरी ४३ रन जोडे।
अर्का ओपनर कुशल भुर्तेलले ३९ बलमा ५ चौका प्रहार गरी २९ रन बनाए। गुल्सन झाले १५ रन बनाउँदा आरिफ शेख १८ रन बनाएर नट आउट रहे।
बलिङतर्फ अमेरिकाका लागि शुभम रन्जणेले ३ विकेट लिए। रशिल उगारकर र मिलिन्ड कुमारले एक/एक विकेट लिए।
नेपालले पहिलो खेलमा अमेरिकालाई ९ विकेटले हराएको थियो।
अमेरिका र स्कटल्याण्ड लिग-२ अंक तालिकाको पहिलो र दोस्रो स्थानमा छ।
जारी सिरिजबाट नेपाल तालिकामा दुई स्थान माथि उक्लिएको छ। यसअघि सातौं स्थानमा थियो। स्कटल्याण्डविरूद्ध जितसँगै क्यानडा र नामिबियालाई उछिन्दै नेपाल पाँचौं स्थानमा उक्लिएको छ।
नेपाल विश्वकपको ग्लोबल क्वालिफायरमा छनोट हुन अब बाँकी सबै खेल जित्नुपर्छ भने एकदिवसीय मान्यता जोगाउन शीर्ष ६ मा रहिरहनुपर्छ।
-1779437786.jpg)
