अन्तर्राष्ट्रिय क्रिकेट परिषद् (आइसिसी) ले नेपाल प्रिमियर लिग (एनपिएल) को तेस्रो संस्करणका सबै खेललाई लिस्ट ‘ए’ टी-२० को मान्यता दिएको छ।
यो नेपाली क्रिकेटको यात्रामा ऐतिहासिक उपलब्धि हो।
नेपाल क्रिकेट संघ (क्यान) ले यसअघि एनपिएलको तेस्रो संस्करणले आइसिसीको औपचारिक मान्यता पाएको जानकारी दिएको थियो। आइसिसीको यो मान्यताले नेपालको घरेलु क्रिकेट प्रतियोगिताको अन्तर्राष्ट्रिय पहिचान थप मजबुत बनाउने अपेक्षा गरिएको छ।
एनपिएलको तेस्रो संस्करण अक्टोबर २६ देखि नोभेम्बर २१ सम्म कीर्तिपुरस्थित त्रिवि अन्तर्राष्ट्रिय क्रिकेट मैदानमा आयोजना हुँदैछ।
यस संस्करणमा पहिलोपटक डिसिजन रिभ्यु सिस्टम (डिआरएस) समेत प्रयोग हुँदैछ। डिआरएसको प्रयोगले अम्पायरका केही निर्णय पुनरावलोकन गर्न सकिनेछ। यसले प्रतियोगितामा प्रविधिको प्रयोग र निर्णय प्रक्रियालाई थप व्यवस्थित बनाउने अपेक्षा गरिएको छ।
एनपिएलका सबै खेलले लिस्ट ‘ए’ टी-२० मान्यता पाउनु र डिआरएसको प्रयोग सुरू हुनु नेपाली क्रिकेटलाई अन्तर्राष्ट्रिय स्तरमा स्थापित गर्ने दिशाका महत्त्वपूर्ण कदम हुन्।
-1792036188.jpg)
