नयाँ वर्षको अवसरमा प्रदर्शनमा आउने भनिएको फिल्म 'डल्लेले इन्ट्री मार्यो' पोस्टपोन्ड भएको छ।
सागर लम्साल 'बले' को मुख्य अभिनय रहेको फिल्म चैत २७ गतेदेखि प्रदर्शनमा आउने तय थियो। अब फिल्म उक्त मितिमा रिलिज नहुने भएको निर्देशक राजु गिरीले बताए।
उनका अनुसार केही प्राविधिक काम अझै बाँकी रहेको र प्रचारप्रसारलाई समय कम हुने भएपछि पोस्टपोन्ड गरिएको हो। 'चैत २७ मा नआउने भयो। तर नयाँ मिति टुंगो लागिसकेको छैन,' उनले भने।
यो फिल्मको एउटा गीत अझै छायांकन हुन बाँकी छ। तर बुझिएअनुसार कलाकारले समय नदिँदा छायांकन हुन सकेको छैन। निर्देशक गिरीले केही दिनअघि कलाकारले प्रमोसनमा समय नदिएको गुनासो गर्दै स्टाटस समेत लेखेका थिए। उनले अभिनेता सागर लम्साललाई लक्षित गर्दै स्टाटस लेखेको बुझिन्छ। सागर यतिबेला फिल्म ‘पाँच पाण्डव’ को छायांकनमा छन्।
फिल्म 'डल्लेले इन्ट्री मार्यो' पोस्टपोन्ड भएसँगै चैत २७ मा विराज भट्ट अभिनीत फिल्म 'राम नाम सत्य' मात्र प्रदर्शनमा आउने भएको छ। यसअघि चैत २७ मा प्रदर्शन हुने भनिएको रेखा थापाको फिल्म '३६ को आँकडा' पनि उक्त मितिबाट पछि सरेको छ। निर्देशक सबिर श्रेष्ठले '३६ को आँकडा' चैत २७ गते रिलिज नहुने भएको बताएका छन्।
बैशाख १ गते तुलसी घिमिरेको फिल्म 'पहाड' रिलिज हुने तयारीमा छ।
