चलचित्र विकास बोर्डले पछिल्लो आइतबारसम्मको आधिकारिक बक्स अफिस विवरण सार्वजनिक गरेको छ।
सोमबार फिल्म 'रोल नं. १' र 'जाँड' को बक्स अफिस कमाइ सार्वजनिक गरिएको हो। यसअघि सूचीमा रहेका स्वस्तिमा खड्का अभिनीत 'लालीबजार' र जितु नेपाल अभिनीत 'आइ एम जीतबहादुर' भने सूचीबाट बाहिरिएका छन्।
यससँगै 'लालीबजार' र 'आई एम जितबहादुर' ले आफ्नो प्रदर्शन यात्रा टुंग्याएका छन्। 'लालीबजार' को आधिकारिक लाइफटाइम ग्रस कमाइ ९ करोड ३२ लाख ९ हजार ९२५ रूपैयाँ छ। यो फिल्मको ३ लाख १७ हजार १२ वटा टिकट बिक्री भएका छन्।
त्यस्तै, 'आई एम जितबहादुर' ले ३१ लाख ३६ हजार ११२ रूपैयाँ मात्रै ग्रस कमाएको छ। यो फिल्मको ९ हजार ७४२ वटा मात्रै टिकट बिक्री भएका छन्।
वैशाख २५ गते रिलिज 'लालीबजार' ले आफ्नो ५१ दिने प्रदर्शन यात्रा पार गर्दै बक्स अफिसमा ठूलो सफलता हात पारेको हो।
यम थापा निर्देशित 'लालीबजार' यस वर्षको अहिलेसम्मको सर्वाधिक सफल नेपाली फिल्म बनेको छ। यो फिल्ममा स्वस्तिमासहित विशाल देवकोटा, रवीन्द्रसिंह बानियाँ, समाइरा थापा, प्रशंसा सुवेदी, मुकुन्दकुमार श्रेष्ठलगायत कलाकारहरूको अभिनय छ।
यस्तै, असार ५ गतेदेखि प्रदर्शनमा आएको 'आई एम जितबहादुर' को बक्स अफिस यात्रा भने ३१ लाखमै सीमित हुन पुगेको हो। सुवेन्दु घोष निर्देशित यो फिल्ममा जितुसहित वर्षा राउत, प्रियंका कार्की जोशी, सन्दिप क्षेत्रीलगायतको अभिनय छ।
'रोल नं. १' ले कमायो १ करोड ७७ लाख
फिल्म 'रोल नं. १' को ग्रस कमाइ १ करोड ७७ लाख ६ हजार ५८३ रूपैयाँ पुगेको छ। जेठ १५ गतेदेखि प्रदर्शनमा आएको फिल्मले असार २८ गतेसम्ममा उक्त कमाइ गरेको हो। यसको ७० हजार ६७४ टिकट बिक्री भएको विवरणमा उल्लेख छ।
जौन योञ्जनको निर्देशनमा बनेको 'रोल नं. १'मा मुकुन भुसाल, निर्भिक रेग्मी, सुशांक मैनाली, रेणु नाथ योगी, एवोन राज उप्रेती, संयम कटुवाललगायत कलाकारहरूको अभिनय छ।
वर्षकै सबभन्दा कमजोर बन्यो 'जाँड'
'जाँड' भने व्यापारका हिसाबमा यस वर्षको अहिलेसम्मकै सबभन्दा कमजोर फिल्म बनेको छ। आधिकारिक बक्स अफिस विवरणअनुसार फिल्मले हालसम्म १ लाख २६ हजार ५ रूपैयाँ मात्र ग्रस कमाइ गरेको हो। यसको ६२१ वटा मात्रै टिकट बिक्री भएको विवरणमा उल्लेख छ।
राजु शाहको निर्देशनमा बनेको 'जाँड' असार १२ गतेदेखि प्रदर्शनमा आएको थियो। फिल्ममा रमेश उप्रेती, पदम गुरूङ, कमला दाहाल, सान्भी खतिवडा, सुवास गजुरेललगायत कलाकारहरूको अभिनय छ।
नेपाली फिल्म नहुँदा यतिबेला सिनेमा हल विदेशी फिल्मले भरिएका छन्।
