भारतमा प्रभासको फिल्म 'सलार' ले अग्रिम टिकट बुकिङमा शाहरूख खानको फिल्म 'डंकी' लाई पछि पारेको छ।
शाहरूखको 'डंकी' बिहीबार प्रदर्शन हुँदैछ भने प्रभासको 'सलार' शुक्रबार। यी दुवै फिल्मलाई लिएर दर्शक उत्साहित देखिएका छन्।
भारतीय सञ्चारमाध्यमका अनुसार उच्च शो पाउँदा पनि 'डंकी' अग्रिम टिकट बुकिङमा 'सलार' भन्दा पछि परेको हो। भारतमा 'डंकी' ले १२६०८ शोज पाएको छ भने 'सलार' ले ६४३९ शोज पाएको छ।
३ लाख ६० हजारबढी टिकट बिक्री गर्दै 'डंंकी' ले १० करोड २६ लाख भारू कमाएको छ।
त्यस्तै ५ लाख ७७ हजारबढी टिकट बिक्री गर्दै 'सलार' ले १२ करोड ६७ लाख भारू कमाएको छ। भारतमा तेलुगु भाषी 'सलार' हेर्न सबैभन्दा बढी उत्साहित देखिएका छन्। तेलुगु संस्करणको मात्रै ३ लाख ८२ हजारबढी टिकट बिक्री भएको भारतीय सञ्चारमाध्यममा उल्लेख छ।
राजकुमार हिरानीले निर्देशन गरेको फिल्म 'डंकी' मा शाहरूखसँगै तापसी पन्नू, विक्की कौशल, बोमन इरानी, सतीश शाह, दीया मिर्जालगायत कलाकारको अभिनय छ।
प्रशान्त नीलले निर्देशन गरेको फिल्म 'सलार' मा प्रभाससँगै श्रुति हासन, जगपति बाबु, टीनू आन्नद, पृथ्वीराज सुकुमारनलगायत कलाकारको अभिनय छ। प्रभास र प्रशान्तले यो फिल्ममार्फत पहिलो पटक सहकार्य गरेका हुन्।
