नवजोत सिंह सिद्धू पुनः 'द ग्रेट इन्डियन कपिल शो' मा फर्किएका छन्। शनिबारबाट नेटफ्लिक्समा प्रसारण भएको तेस्रो सिजनबाट सिद्धू कार्यक्रममा जजका रूपमा देखिएका हुन्।
कार्यक्रममा सिद्धूसँगै अर्चना पुरन सिंह पनि जज छिन्। सात वर्षअघि सिद्धू कपिल शर्मा शोबाट बाहिरिएपछि अर्चना नै जज थिइन्।
नेटफ्लिक्समा चलिरहेको 'द ग्रेट इन्डियन कपिल शो' को तेस्रो सिजनको पहिलो भागदेखि भने दुवै जज देखिएका हुन्।
कपिल शर्माले सिद्धूको पुनरागमनलाई रमाइलो शैलीमा व्यक्त गरेका थिए।
'नेटफ्लिक्सले धेरै पैसा दिएपछि सिद्धूजी कार्यक्रममा आउनुभएको हो। नेटफ्लिक्सले मात्र सिद्धूजीलाई ल्याउने सामर्थ्य राख्छ,' कपिलले भने।
भारतीय मिडिया रिपोर्ट अनुसार सिद्धूले प्रतिभाग ३०–४० लाख भारतीय रूपैयाँ लिइरहेका छन्।
सिद्धू पनि कार्यक्रममा उत्साहित देखिएका थिए। उनले यो शोमा फर्किनु भनेको घर फर्किनुजस्तै भएको बताए।
स्रोतका अनुसार सिद्धूले आफू जजका रूपमा आए पनि कार्यक्रमबाट अर्चना पुरन सिंहलाई नहटाउन भनेका थिए। त्यसैले अबदेखि दुई जज नै रहनेछन्।
सिजनको पहिलो भागमा बलिउड अभिनेता सलमान खान अतिथिका रूपमा आएका थिए। कार्यक्रममा सुनील ग्रोवर, कृष्णा अभिषेक, किकु शार्दा, राजीव ठाकुर लगायतको प्रस्तुति छ।
२०७५ सालमा कश्मिरको पुलवामा भएको आतंकी हमलाका बारेमा दिएको टिप्पणीका कारण तत्कालीन पन्जाबका मन्त्री समेत रहेका सिद्धू विवादमा तानिएका थिए। उनको टिप्पणीलाई लिएर सामाजिक सञ्जालमा व्यापक विरोध भएपछि 'द कपिल शर्मा शो' बाट उनलाई निकालिएको थियो।
हिन्दुस्तान टाइम्सका अनुसार सिद्धूले पुलवामा हमलाबारे सञ्चारमाध्यममा भनेका थिए- यो हमलाका लागि कुनै देश वा कुनै व्यक्तिलाई दोषी भन्नु गलत हो। आतंककारीको कुनै जात र धर्म हुँदैन। सबै ठाउँमा राम्रा, नराम्रा र अति नै नराम्रा मान्छे हुन्छन्। सबै देशमा हुन्छन्। अति नराम्रालाई सजाय दिनुपर्छ।
यो विषयमा सिद्धूको टिप्पणी पाकिस्तानीप्रति नरम भएको भन्दै फ्यानहरूले उनलाई कपिल शोबाट निकाल्न माग गरेका थिए। ट्विटरमा उनलाई हटाउनेबारे ट्रेन्ड नै चलेपछि सोनी च्यानलले यो निर्णय गरेको सञ्चारमाध्यमले जनाएका छन्। फ्यानहरूले सिद्धूलाई राखिरहे शो नै नहेर्ने समेत भनेका थिए।
त्यो बेला कपिल शर्मा शो अभिनेता सलमान खान प्रोडक्सनको निर्माणमा प्रसारण भइरहेको थियो। सिद्धू निकालिएपछि अर्चना पुरन सिंह उनको ठाउँमा आएकी थिइन्।
बीचमा केही समय कपिल शर्माको आफ्नै विवादका कारण शो बन्द भएको थियो।
नेटफ्लिक्समा द ग्रेट इन्डियन कपिल शोबाट ६ वर्षपछि सुनील ग्रोवरले कमब्याक गरेका थिए। सुनीललाई कपिलले एकपटक जहाजमा दुर्व्यवहार गरेका थिए। यो विवाद बढ्दै गएपछि सुनीलले शो छाडेका थिए।
यसरी कपिलको कार्यक्रममा पुराना सदस्यहरूको पुनरागमन हुँदै गएको छ।
