भारतीय अभिनेता रणवीर सिंह स्टारर फिल्म 'धुरन्धर' ले राम्रो व्यापार गरिरहेको छ।
फिल्मले भारतमा मात्र बुधबारसम्म १८० करोड भारूभन्दा माथिको कमाइ गरेको छ। भारतबाहिर फिल्मले ४ दिनमा ४४.०८ करोड भारू आम्दानी गर्न सफल भएको जनाइएको छ।
खाडी मुलुकमा पनि फिल्म रिलिज भएको भए कमाइ अझ बढ्न सक्ने बताइन्छ। फिल्मको विषयवस्तुको कारणले खाडी मुलुकमा 'धुरन्धर' रिलिज हुन नसकेको बताइएको छ।
बलिउड हंगामाले स्रोतलाई उद्दित गर्दै लेखेको छ, 'बहराइन, कुवेत, ओमान, कतार, साउदी अरब र युएईमा 'धुरन्धर' रिलिज भएको छैन। फिल्मलाई 'एन्टि-पाकिस्तान' विषयवस्तु भएको रूपमा हेरिँदै आएकोले प्रतिबन्धको आशंका पहिले नै थियो। यस्ता विषयका फिल्महरू यस क्षेत्रले विगतमा पनि स्वीकृति नदिने गरेको छ। यसपटक पनि प्रयास गरिए पनि खाडी देशहरूले फिल्मको विषयवस्तुलाई अस्वीकार गरे।'
बलिउड हंगामाका अनुसार फिल्म 'फाइटर' (२०२४) सुरूमा युएईबाहेक सबै खाडी देशहरूमा प्रतिबन्धित गरिएको थियो।
त्यस्तै, 'स्काई फोर्स', 'द डिप्लोम्याट', 'आर्टिकल ३७०', 'टाइगर ३' र 'द कश्मीर फाइल्स' जस्ता पाकिस्तान वा संवेदनशील राजनीतिक प्रसंग समेटिएका फिल्महरू पनि विगतमा विभिन्न मध्यपूर्वी देशहरूले प्रतिबन्धित गरेका थिए।
'धुरन्धर' को कुरा गर्दा आदित्य धरद्वारा निर्देशित यो फिल्ममा रणवीरसहित अक्षय खन्ना, संजय दत्त, आर. माधवन, अर्जुन रामपाल, सारा अर्जुन र राकेश बेदीको अभिनय छ। कथामा एक भारतीय अधिकारी पाकिस्तानमा घुसेर त्यहाँको अन्डरवर्ल्ड र राजनीतिक संरचनामा तहल्का मच्चाउने प्रसंग समेटिएको छ।
नेपालमा सिनेमा हलहरूमा समेत फिल्म प्रदर्शन भइरहेको छ।
-1763886130.jpeg)
-1746009348.jpg)
