बलिउड अभिनेत्री शिल्पा शेट्टीको चर्चित 'बास्टियन' रेस्टुरेन्टमा आयकर विभागले छापा मारेको छ।
मुम्बईको बान्द्रामा अवस्थित रेस्टुरेन्टमा आयकर अधिकारीहरूको टोलीले बुधबार घण्टौंसम्म कागजात जाँच तथा अनुसन्धान गरेको भारतीय सञ्चारमाध्यमहरूले जनाएका छन्।
छापा मारिएपछि आयकर विभागले भने कुनै जानकारी जारी गरेको छैन।
यसअघि नै शिल्पा शेट्टीसँग जोडिएको बेंगलुरूस्थित 'बास्टियन' रेस्टुरेन्टविरूद्ध मंगलबार एफआइआर दर्ता भइसकेको छ।
निर्धारित समयभन्दा बढी खुला रहने र राती पार्टीहरूलाई अनुमति दिएर नियमहरू उल्लङ्घन गरेको आरोप लगाइएको छ। कर्नाटक प्रहरीद्वारा कर्नाटक पुलिस ऐनअन्तर्गत मुद्दा दर्ता गरिएको हो।
शिल्पा शेट्टीले भने यी सब विषय कानुनी प्रक्रियाको हिस्सा भएको बताउँदै आफूले कुनै नियम उल्लङ्घन नगरेको दाबी गरेकी छन्। कुनै कानुनी आधारबीना नै आरोप लगाइएको उनको भनाइ छ। उनले अनुसन्धानमा पूर्ण सहयोग गर्ने जनाएकी छन्।
शिल्पा शेट्टी र उनका पति राज कुन्द्रा जोडिएको करिब ६० करोड रूपैयाँ बराबरको ठगीसम्बन्धि अर्को मुद्दामा पनि अनुसन्धान जारी रहेको बताइएको छ।
मुम्बईका एक व्यापारीले ऋण सहलगानी सम्झौताको सम्बन्धमा दम्पतीविरूद्ध आरोप लगाएका छन्।
-1746009348.jpg)
