बलिउड अभिनेता रणवीर सिंह, अक्षय खन्ना लगायतको अभिनय रहेको फिल्म 'धुरन्धर' ले बक्स अफिसमा आक्रामक कमाइ गरिरहेको छ।
यो फिल्मले ओटिटीमा पनि नयाँ रेकर्ड बनाएको छ। भारतीय संचारमाध्यमहरूका अनुसार 'धुरन्धर' को डिजिटल राइटस हिन्दी फिल्मको सन्दर्भमा अहिलेसम्मकै उच्च मूल्यमा बिक्री भएको हो।
फिल्मको दुवै भागको डिजिटल अधिकार नेटफ्लिक्सले खरिद गरेको छ। यसअघि फिल्मको डिजिटल राइटस १३० करोड भारूमा बिक्री भएको खबर आएको थियो। तर नयाँ सम्झौताअनुसार डिजिटल राइटस फिल्मको दुवै भागको गरेर २ सय ८५ करोड भारूमा बिक्री भएको फिल्म समाचारमा केन्द्रित भारतीय बेवसाइट कोइमोइले समाचार लेखेको छ। सो मूल्य हिन्दी फिल्मका लागि अहिलेसम्मकै उच्च मानिएको छ।
समाचारअनुसार 'धुरन्धर' ले अल्लु अर्जुन अभिनीत फिल्म 'पुष्पा-२' ले बनाएको डिजिटल राइटसको रेकर्डलाई समेत उछिनेको हो। 'धुरन्धर' को पहिलो भागको सफलता र महँगो मूल्यका ओटिटी बिक्रीले दोस्रो भागप्रति पनि व्यापारिक अपेक्षा बढेको छ।
आदित्य धर निर्देशित 'धुरन्धर' डिसेम्बर ५ मा रिलिज भएको थियो। फिल्ममा रणवीर र अक्षयसहित आर माधवन, अर्जुन रामपाल, संजय दत्त, सारा अर्जुन लगायत कलाकारहरूको अभिनय छ। यसले नेपालमा समेत आकर्षक कमाइ गरिरहेको छ।
'धुरन्धर' को दोस्रो भाग सन् २०२६ मो मार्चमा रिलिज हुने तय छ।
-1746009348.jpg)
