दक्षिण भारतीय फिल्मका सुपरस्टार थलापति विजय आफ्नो आगामी फिल्म 'जन नायगन' को अडिओ लन्च कार्यक्रममा भावुक देखिएका छन्।
विजयको अन्तिम भनिएको यो फिल्मको मलेसियाको नेशनल स्टेडियम बुकिट जालिलमा भव्य कार्यक्रमकाबीच अडिओ लन्च गरिएको थियो। कार्यक्रमलाई सम्बोधन गर्दै उनले 'जन नायगन' आफ्नो जीवनको विशेष मोड भएको उल्लेख गर्दै यसलाई पूरा गर्नु आफ्ना लागि अलि पीडादायी भएको अनुभव सुनाए।
'थलापति थिरूविझा' नाम दिएर शनिबार आयोजित कार्यक्रममा विजयले उपस्थित हजारौं प्रशंसकलाई सम्बोधन गर्दै गर्दा केही भावुक भएका थिए।
उनले भने, 'यो मेरो अन्तिम फिल्म हो भनेर स्वीकार गर्न अलि गाह्रो छ। यो अनुभव सुखद् मात्र होइन्, अलिकति पीडादायी पनि छ। अब म के गर्छु भन्ने प्रश्नले मन छोइरहेको छ।'
'जन नायगन' विजयको तीन दशक लामो अभिनय करिअरको अन्तिम फिल्म मानिएको छ। यसपछि उनी पूर्ण रूपमा राजनीतिमा सक्रिय हुने चर्चा लामो समयदेखि चल्दै आएको छ।
कार्यक्रममा विजयले आफ्ना दर्शक, सहकर्मी र फिल्म टोलीप्रति आभार व्यक्त गर्दै दर्शककै माया र समर्थनले आफू यहाँसम्म आएको बताए। कार्यक्रममा फिल्म निर्माता तथा निर्देशक एटलीले विजयसँगको सहकार्य स्मरण गर्दै उनको अनुशासन, विनम्रता र समर्पणको खुलेर प्रशंसा गरे।
केभीएन प्रोडक्सनद्वारा निर्मित 'जन नायगन' एच. विनोथले निर्देशन गरेका हुन्।
फिल्ममा थलापति विजयसँगै पूजा हेगडे, बबी देओल, प्रकाश राज, प्रियामणि, नारायण, ममिता बैजुलगायतको अभिनय छ।
फिल्मलाई एक सामाजिक-राजनीतिक विषयवस्तुमा प्रस्तुत गरिएको छ। विजयको अन्तिम फिल्म भएकाले 'जन नायगन' प्रति उच्च अपेक्षा गरिएको छ। ९ जनवरी २०२६ मा यसको विश्वव्यापी प्रदर्शन तालिका तय छ। नेपालमा पनि फिल्म प्रदर्शनमा आउनेछ।
-1756794700.JPG)
-1746009348.jpg)
