बलिउड अभिनेता राजपाल यादव आर्थिक तथा कानुनी समस्यामा परेपछि फिल्म उद्योगका विभिन्न व्यक्तिहरूले उनलाई सहयोगको प्रस्ताव गरेका छन्।
९ करोड भारतीय रूपैयाँ ऋण र चेक बाउन्ससम्बन्धी मुद्दामा अदालतको आदेशपछि उनी जेलमा छन्।
उनले गत बिहीबार दिल्लीको तिहाड जेलसमक्ष आत्मसमर्पण गरेका थिए। भारतीय संचारमाध्यमका अनुसार यतिबेला राजपाललाई थुप्रै कलाकारहरूले सहयोगको घोषणा गरेका छन्।
अभिनेता सोनू सूदले राजपाल यादवलाई आफूले निर्माण गर्ने फिल्ममा कामको अवसर दिने र साइनिङ रकम उपलब्ध गराउने घोषणा गरेका छन्।
उनले यो सहयोग दान नभई सम्मानको विषय भएको उल्लेख गर्दै फिल्म उद्योगलाई साथ दिन आग्रह समेत गरेका छन्। संगीत निर्माता राव इन्द्रजीत सिंह यादवले १ करोड १० लाख भारू सहयोग गर्ने बताएका छन्। गायक गुरू रन्धावाले पनि सहयोगको घोषणा गरे।
स्वघोषित फिल्म समीक्षक कमाल आर खान (केआरके) ले राजपाल यादवलाई १० लाख भारू सहयोग गर्ने प्रस्ताव गरेका छन्। साथै उनले बलिउड उद्योगसँग मिलेर कुल ५ करोड भारू संकलन गर्न आह्वान गरेका छन्।
अभिनेता गुरमीत चौधरीले पनि राजपालको कठिन परिस्थितिमा समर्थन जनाउँदै उद्योगका सदस्यहरू एकजुट हुनुपर्ने बताएका छन्। राजनीतिक नेता तेजप्रताप यादवले ११ लाख भारू सहयोग गर्ने घोषणा गरेका छन्।
५३ वर्षीय राजपाल यादवले सन् २०१० मा निर्देशन गरेको फिल्म 'अता पता लापता' असफल भएपछि उनीमाथि ऋणको भार बढ्दै गएको थियो। त्यसबेला उनले ऋण तिर्न जारी गरेका चेकहरू बाउन्स भए।
चेक बाउन्स मुद्दा लामो समयसम्म अदालतमा विचाराधीन रहँदा सन् २०१८ मा मजिस्ट्रेट अदालतले राजपाल यादव र उनकी श्रीमतीलाई ऐनको धारा १३८ अन्तर्गत दोषी ठहर गर्दै छ महिनाको जेल सजाय सुनाएको थियो।
राजपालले फैसलालाई चुनौती दिँदै धेरै पुनरावेदनहरू मार्फत राहत खोजे पनि, मुद्दा वर्षौंसम्म चल्यो। सो अवधिमा बक्यौता रकम बढेर लगभग ९ करोड भारू पुगेको बताइएको छ।
पछिल्लो समय दिल्ली उच्च अदालतले उनलाई पटक-पटक समय दिएको भए पनि उनी समयमै रकम तिर्न सकेनन्। अदालतले अन्ततः आत्मसमर्पणको आदेश जारी गर्दै अतिरिक्त समयको निवेदन अस्वीकृत गर्यो। यसै निर्णयको पालना गर्दै यादवले तिहाड जेलसमक्ष आत्मसमर्पण गरेका हुन्।
आत्मसमर्पणको केही क्षणअघि यादवले प्रहरी र अधिकारीहरूका अगाडि भावुक हुँदै प्रतिक्रिया दिएका थिए।
उनले भनेका थिए, 'सर, के गरूँ? मसँग पैसा छैन। अरू उपाय पनि देखिंदैन। यहाँ हामी सबै एक्लै छौं।'
राजपाल अब अक्षय कुमारको 'भूत बंगला' मा देखा पर्नेछन्, जुन अप्रिल १० मा रिलिज हुनेछ।
-1746009348.jpg)
