बलिउड अभिनेता शाहरूख खान निर्देशक सिद्धार्थ आनन्दको फिल्म 'किङ' मार्फत एक्सन-प्याक अवतारमा फर्कन तयार छन्।
'पठान' को सफलतापछि शाहरूख र सिद्धार्थको यो दोस्रो सहकार्य हो। सन् २०२३ को फिल्म ‘पठान’ ले विश्वव्यापी बक्स अफिसमा १ हजार ५० करोड भारूभन्दा बढी कमाइ गरेको थियो।
यसैबीच निर्देशक सिद्धार्थ आनन्दले 'किङ' मा बक्स अफिसको दबाब नरहेको बताएका छन्। भेराइटी इण्डियासँगको कुराकानीमा सिद्धार्थले ठूलो स्टारकास्ट र दर्शकको उच्च अपेक्षा भए पनि आफूहरूले कुनै निश्चित 'फर्मुला' पछ्याएर फिल्म निर्माण नगरेको बताए।
उनले भनेका छन्, 'जब तपाईं शाहरुख खानजस्ता सुपरस्टारसँग काम गर्नुहुन्छ, अपेक्षा स्वाभाविक रूपमा ठूलो हुन्छ। तर त्यसलाई दबाबका रूपमा लिनु हुँदैन।'
उनले बक्स अफिसका आँकडा हेरेर कथा निर्माण गर्न खोज्दा सिर्जनात्मकता प्रभावित हुने धारणा व्यक्त गरे।
उनका अनुसार दर्शकलाई के मनपर्छ भन्ने अनुमानका आधारमा फिल्म बनाउने सोचले फिल्मको मौलिकता कमजोर बनाउँछ। त्यसैले 'किङ' निर्माणका क्रममा आफूहरूले कुनै व्यापारिक दबाब महसुस नगरी कथावस्तु र प्रस्तुतीकरणमा केन्द्रित भएको उनले बताए।
'हामी किङमा कडा परिश्रम गरिरहेका छौं मानौं यो हाम्रो पहिलो फिल्म हो। हामीले फेरि दर्शकहरूसँगको परीक्षा पास गर्नुपर्छ। हामी त्यही उद्देश्यका साथ काम गरिरहेका छौं। हामी अपेक्षाहरू बारे सचेत छौं, तर हामी दबाब दिएका छैनौं', सिद्धार्थले भनेका छन्।
गत वर्ष नोभेम्बरमा 'किङ' को पहिलो झलक सार्वजनिक गरिएको थियो। यो फिल्ममा शाहरूख खानसँगै उनकी छोरी सुहाना खानको पनि अभिनय रहनेछ। साथै दीपिका पादुकोण र रानी मुखर्जीलगायत कलाकारहरू पनि फिल्ममा देखिने जनाइएको छ।
रेड चिलीज इन्टरटेनमेन्ट र माफ्र्लिक्स पिक्चर्सद्वारा निर्मित 'किङ' २४ डिसेम्बर २०२६ विश्वव्यापी प्रदर्शनमा आउने तालिका छ।
-1746009348.jpg)
