बलिउड अभिनेता राजपाल यादव जेलबाट रिहा भएका छन्। मंगलबार जेलबाट रिहा भएसँगै पत्रकारहरूसँग कुरा गर्दै उनले प्रशंसक र आफूलाई समर्थन गर्नेहरूप्रति धन्यवाद दिए।
उनले भने, 'म २०२७ मा बलिउड यात्राको ३० वर्ष पूरा गर्नेछु। देशभरिका मानिस, बच्चादेखि बुढापाकासम्म, सबै मेरो साथमा हुनुहुन्छ। जसरी सम्पूर्ण देश तथा विदेश, मेरो बलिउडले मलाई माया दिएको छ। यदि मेरो विरूद्ध कुनै आरोप छन् भने त्यसको जबाफ दिन तयार छु। धन्यवाद, उच्च अदालत।'
९ करोड भारू ऋण मुद्दामा १ करोड ५० लाख भारू जम्मा गरेपछि राजपाललाई सोमबार दिल्ली उच्च अदालतले अन्तरिम जमानत दिएको हो। मार्च १८ सम्मका लागि अन्तरिम जमानत पाएपछि उनी रिहाइको कानुनी प्रक्रिया पूरा गरेर मंगलबार तिहाड जेलबाट बाहिर आएका हुन्। यसअघि बलिउडका थुप्रै कलाकार र साथीहरूले उनलाई सहयोग र समर्थन गरेका थिए।
राजपालले सन् २०१० मा आफ्नै निर्देशनमा बनाएको फिल्म 'अता पता लापता' का लागि ऋण लिएका थिए। फिल्म फ्लप भएपछि उनले ऋण फिर्ता गर्न सकेनन्। दिएका चेक पनि नसाटिएपछि चेक बाउन्स कानुन अन्तर्गत मुद्दा दायर भएको थियो।
उनले ५ फेब्रुअरी २०२६ मा तिहाड जेलसमक्ष आत्मसमर्पण गरेका थिए।
राजपालले यो मुद्दा र यससँग सम्बन्धित अन्य प्रश्नहरूको जवाफ दिन पत्रकार सम्मेलन पनि गर्ने जनाइएको छ। मुद्दाको अर्को सुनुवाइ मार्च १८ मा हुनेछ।
-1746009348.jpg)
